Astanadaǵy aqyly turaqtardy ákimdikke berý: basqarý tetigi ózgerýi múmkin
ASTANA. KAZINFORM – «Astananyń turaq keńistigi» JShS elorda ákimdiginiń menshigine ótkeli jatyr. Aqyly turaqtar atqarýshy organnyń teńgerimine tirkelgen soń qandaı ózgeris bolady? Tólemaqy arzandaı ma? Tegin turý ýaqyty uzara ma? Kazinform tilshisi osy máseleni anyqtap kórdi.
— Qazirgi ýaqytta aqyly avtoturaqtardy qala balansyna kommýnaldyq menshikke berý jáne toqtatý jumystary júrgizilip jatyr. Bul sheshim turaq ınfraqurylymyn basqarýdy jaqsartýǵa jáne elordadaǵy turaq oryndaryn tıimdirek baqylaýdy qamtamasyz etýge baǵyttalǵan. Bolashaqta bul turaq uıymdastyrýdyń jańa tetikterin engizýge, sondaı-aq qala turǵyndary men qonaqtaryna qyzmet kórsetý sapasyn arttyrýǵa múmkindik beredi, - delingen elordanyń Kólik jáne jol-kólik ınfraqurylymyn damytý basqarmasynyń jaýabynda.
Sondaı-aq, habarlamada qazirgi ýaqytta tek «Astananyń turaq keńistigi» JShS-men memlekettik-jekemenshik áriptestik shartyn buzý úderisi júrip jatqany aıtylǵan.
- Qazirgi ýaqytta aqparat tek «Astananyń turaq keńistigi» JShS-men MJÁ shartyn buzý úderisimen shektelgen. Ári qaraıǵy qadamdar men ózgeristerge qatysty suraqtar ázirge damý satysynda tur jáne qazirgi ýaqytta olarǵa jaýap berý múmkin emes, - deıdi basqarmadan.
Aqyly turaqtardyń ákimdik qaramaǵyna alynatyny jaıly keshe Astana qalasy ákimi Jeńis Qasymbektiń Esil aýdanynyń turǵyndarymen kezdesýinde aıtyldy. Onda qala basshysy jeke kompanııaǵa jobaǵa salǵan qarjysyna baılanysty ótemaqy beriletinin atap ótti. Biraq ázirshe naqty qandaı somada ótemaqy beriletini jaıly naqty málimet joq.
Buǵan deıin basqarma 2025 jylǵy aqyly turaq aqysyna qatysty saýalǵa jaýap bergen edi.
Sondaı-aq depýtat Astanadaǵy aqyly turaqtarda 30 mınýt tegin turý tetigin engizýdi usynǵan bolatyn.
Odan bólek, Astanada áli 2 800 oryn aqyly turaqqa aınalatyny aıtylǵan.