Astanadaǵy aqyly turaqtar kommýnaldyq menshikke qashan qaıtarylady

ASTANA. KAZINFORM — Elordanyń Kólik jáne jol-kólik ınfraqurylymyn damytý basqarmasy «Astana turaq keńistigine» qatysty máseleni sheshý jumystary qaı kezeńde ekenin jáne turaq tarıfine qatysty túsinik berdi.

Atap aıtqanda, buǵan deıin «Astana turaq keńistigi» kompanııasy kommýnaldyq menshikke ótetini jáne osyǵan tıisti merzim kerek ekeni aıtylǵan edi. 

— Qazirgi ýaqytta memlekettik-jekeshelik áriptestik kelisimshartyn buzý týraly sot protsesi jalǵasyp jatyr. Barlyq zańdy protsedýralar aıaqtalǵanǵa deıin aqyly turaqtardyń tarıfterindegi yqtımal ózgerister týraly aıtý erte, — delingen basqarmanyń Kazinform agenttigine bergen jaýabynda.

Eske salsaq, bıyl sáýir aıynda Astana ákimi elordadaǵy aqyly turaqtar jańa ınvestorǵa berilýi múmkin degen málimetterdi teriske shyǵardy.

Buǵan deıin mekemeniń múlkin túgendeý jumystary júrip jatqany málim bolǵan edi.