Astanadaǵy 17 parkıng jeke menshikke satylady

ASTANA. KAZINFORM – Bıyl Astana ákimdigi 17 parkıngti jeke menshikke satady. Elordadaǵy jekeshelendirý tizimine engen nysandardyń ishinde kólik qańtaratyn oryndar da bar degen sóz.

Qalalyq kólik jáne jol-kólik ınfraqurylymyn damytý basqarmasynyń basshysy Ashat Qaraǵoıshın máslıhat depýtattaryna parkıngterdi jekeshelendirý qandaı tártippen ótetinin túsindirdi.

- Qazir basqarma menshiginde jalpy syıymdylyǵy 570 oryn bolatyn 27 parkıng bar. Buǵan deıin ol CTS kompanııasynyń senimgerlik basqarýynda bolǵan. Osy 27-niń ishinde 11 parkıngti Jol qozǵalysyn uıymdastyrý ortalyǵyna berý kózdelip otyr. Kommýnaldyq múlikti jekeshelendirý aıasynda aktıvterdi basqarý basqarmasyna taǵy 16 nysan berilgen bolatyn. Pılottyq saýda retinde Abylaıhan kóshesindegi 52 orynnyń saýdasyn jarııaladyq. Qalǵan 15 parkıngti de osyndaı jolmen satý josparlanyp otyr. Qysqasha aıtqanda, bárin satý kerek, - dedi basqarma basshysy.

Qalalyq aktıvter men memlekettik satyp alý basqarmasynyń basshysy Nurlan Álimjanovtyń aıtýynsha, bıyl jekeshelendirýge jatatyn 4 nysannyń ishinde Dene shynyqtyrý jáne sport basqarmasynyń menshigindegi fıtnes-ortalyq ta bar.

Basqarma basshysy Vasılıı Levıttiń aıtýynsha, nysannyń balanstyq quny 2 mlrd teńgeden asady. Oǵan salsa, bul nysandy ákimdik balansynda saqtap qalý kerek.

- Ózim de sportshy bolǵan kezde dene shynyqtyratyn fıtnes quraldarynyń mańyzdylyǵyn qatty sezingenmin. Sondyqtan kásibı sportshylar tegin baratyn bir ortalyqtyń bolǵany jaqsy, - degen sheneýnik depýtattardan qoldaý surady.

Aqyry nysannyń ǵımaratyn jekeshelendirip, ishindegi fıtnes jabdyqtaryn basqa zalǵa kóshirip, ákimdik menshiginde saqtap qalý kerek degen sheshim qabyldandy.

Buǵan deıin Qazaqstan qalalaryndaǵy jertóleler men parkıngter panalaý oryndaryna beıimdeletinin jazǵan edik.