Astanadaǵy 13 kommýnaldyq kompanııa 156,6 mln teńgeni negizsiz tapqan
ASTANA. KAZINFORM – Astana qalasy Tabıǵı monopolııalardy retteý departamenti basshysy Jandos Salımov kommýnaldyq qyzmet salasyndaǵy tarıf-smetalyq-ınvestıtsııalyq baǵdarlamalardyń oryndalý barysy týraly málimet berdi.
- 2024 jyly tarıf-smetaly-ınvestıtsııalyq baǵdarlamalardyń oryndalýyn taldaý kezinde 13 sýbekt shyǵys baptaryn smetalyq tarıfke saı oryndamaǵany belgili boldy. Al bir sýbekt ınvestıtsııalyq baǵdarlamanyń sharasyn oryndamaǵan, - dedi ol óńirlik kommýnıkatsııalar qyzmetinde ótken baspasóz máslıhatynda.
Aıtýynsha, atalǵan 13 kompanııa astanalyqtarǵa sý men jylý, elektr qýatyn jetkizip otyr.
- Osy 13 sýbektige Ulttyq banktiń qaıta qarjylandyrý mólsherlemesi boıynsha 156,6 mln teńge mólsherinde negizsiz kiris alǵany úshin ýaqytsha óteý tarıfi engizildi. Bul sýbektiler sýmen jabdyqtaý, sý burý, jylýmen jabdyqtaý, kireberis joldaryna qyzmet kórsetý, elektr qýatyn berý salalarynda oryn alǵan. Osyny negizge alyp, Astana qalasy boıynsha tabıǵı monopolııalardy retteý departament ákimshilik aıyppul óndirý baǵytynda jumys atqardy.
Sondaı-aq, 1 qyrkúıekten beri «Astana-Teplotranzıt» AQ-ǵa jylý energııasyn berý qyzmeti boıynsha tarıf tómendetildi, - dedi ol.
Jandos Salımov bul aıyppuldar bıýdjetke kiris retinde túsetinin eske saldy.
Buǵan deıin Energetıka mınıstrligi tarıfterdi basqaratyn tsıfrlyq servısti iske qosqanyn jazǵan edik.