Astanada
ASTANA. 16 qarasha. QazAqparat - Búgin Astanadaǵy QR Ulttyq akademııalyq kitaphanasynda "Jańa zaman ádebıeti" serııasymen shyqqan jańa 45 kitaptyń tusaýkeseri ótti.
Onyń ishinde táýelsizdik jyldarynda jazylǵan 25 prozalyq jáne 19 poezııalyq shyǵarmalar bar. Shyǵarylǵan kitaptar ishinen Qadirbek Segizbaıuly, Rahymjan Otarbaev, Ákim Tarazı, Nurǵalı Oraz, Júsipbek Qorǵasbek, Gúlnár Salyqbaı, Ulyqbek Esdáýlet, Marhabat Baıǵut, Tólen Ábdik, Nesipbek Dáýitaıuly, Serik Aqsuńqaruly, Qýandyq Túmenbaı, Nurlan Máýken, Rafael Nııazbekov, Joltaı Álmashuly, Esenqul Jaqypbek, Nesipbek Aıtuly, Baýyrjan Jaqyp syndy belgili aqyndar men jazýshylardyń jańa týyndylaryn erekshe ataýǵa bolady.
"Árıne bul beıbereket shyǵyp jatqan dúnıe emes, belgili bir maqsatpen jaryq kórýde. Solardyń ishinde aıtýǵa turarlyq toptama bul "Jańa zaman ádebıeti". Onyń Negizgi maǵynasy osy bizdiń tól ádebıetimizde táýelsizdik jyldary jaryq kórgen shyǵarmalardyń basyn qosý" - dedi QR Mádenıet jáne aqparat vıtse-mınıstri Arman Qyryqbaev tusaýkeser rásiminde.
Onyń aıtýynsha, serııaǵa engen týyndylar halyqtyń rýhanı-bilim jáne aqyl-oı, mádenıettilik deńgeıiniń joǵarylaýyna, óskeleń urpaqty tárbıeleýge jaǵdaı jasaıdy, memlekettik ustanymdy qalyptastyrady, ulttyq, etıkalyq, mádenıettilik, rýhanı qundylyqtardy, bıik ónegeli jáne patrıottyq sezimdi qalyptastyrady, belsendi azamattyq pozıtsııany tárbıeleıdi.
"Menińshe bul aqyldy, keńinen tolǵanyp, istelgen shara dep oılaımyn. Sebebi osy kitaptardyń barlyǵy bizdiń táýelsizdik alǵannan bergi 20 jyldyń kólemindegi ádebıet qandaı deńgeıge jetti, memleketimizdiń tarıhynda qandaı eleýli oqıǵalar boldy degenge osy kitaptar jaýap beredi", - deıdi aqyn Nesipbek Aıtuly.
