Astanada Zýqa batyrdyń 160 jyldyǵyna arnalǵan halyqaralyq ǵylymı semınar ótedi
ASTANA. KAZINFORM — 6 qarasha kúni Astanada qazaq halqynyń tarıhı tulǵalary Zýqa batyr Sábıtuly men Álıhan Bókeıhannyń týǵanyna 160 jyl tolýyna oraı halyqaralyq ǵylymı semınar uıymdastyrylady.
Іs-shara aıasynda Zýqa batyr Sábıtulynyń 160 jyldyq mereıtoıyna arnalǵan «Qarakópir» jáne «Qorǵan» kitaptarynyń tanystyrylymy men tusaýkeseri ótedi. Onyń ómir joly men erligine arnalǵan jańa jınaqtarǵa zertteýler, maqalalar, óleńder men jyr-tolǵaýlar engizilgen. Kitaptar batyrdyń shyqqan tegi, ómiri men tarıhı qyzmetin tanystyryp, ulttyq tarıhı sanany jańǵyrtýǵa, urpaqtar sabaqtastyǵyn nyǵaıtýǵa baǵyttalǵan. Basylymdar tarıhshylarǵa, zertteýshilerge, ádebıetshilerge jáne qalyń oqyrman qaýymǵa arnalǵan.
Ǵylymı semınar saǵat 11:00–13:00 aralyǵynda L. N. Gýmılev atyndaǵy Eýrazııa ulttyq ýnıversıtetiniń «Otyrar» kitaphanasyndaǵy «Aqseleý Seıdimbek» zalynda ótedi. Sharany EUÝ-dyń «Altyn Orda órkenıeti» kafedrasy uıymdastyrady.
Jıynda Zýqa batyrdyń ómir joly, el qorǵaýdaǵy erligi, qoǵamdyq jáne dinı qyzmeti, sondaı-aq onyń qazaq tarıhyndaǵy orny men murasyn zertteý máseleleri talqylanady. Semınarǵa QR UǴA akademıgi, fılologııa ǵylymdarynyń doktory Dıhan Qamzabekuly, professorlar Serik Negımov pen Tursynhan Záken, «Alash» mádenıet jáne rýhanı damý ınstıtýtynyń dırektory Sultan Han Aqquly, aqyn Ǵalym Jaılybaı, akademık Qaırat Aıdarhanuly jáne ózge de otandyq, sheteldik zııaly qaýym ókilderi qatysady. Olardyń qatarynda Qyrǵyzstan, Germanııa jáne Aýstrııadan kelgen qoǵam qaıratkerleri, sondaı-aq Zýqa batyrdyń urpaqtary bar.
Zýqa batyr Sábıtuly (1866- 1929) — qazirgi Abaı oblysynyń Kendirlik óńirinde dúnıege kelgen, el qorǵaǵan batyr, qoǵam jáne din qaıratkeri. Ol ultqa, dinge jáne áleýmettik jaǵdaıǵa bólmeı, kedeı-kepshikke, álsizge jáne pana izdegen jandarǵa qorǵan bolǵan tulǵa retinde halyq jadynda saqtalǵan. Onyń ómir joly — eldik pen erliktiń, ımandylyq pen adamgershiliktiń, ádildik pen qaısarlyqtyń ónegesi. 1929 jyly Altaıdyń arǵy betinde qaza tapqan batyrdyń ómiri men erligi qazaq ádebıetinde de keńinen kórinis tapty. Atap aıtqanda, Qajyǵumar Shabdanulynyń «Pana», Batyrhan Qusbegınniń «Zýqa batyr» romandary, Talǵat Keńesbaevtyń «Qarańǵy túnniń juldyzy» atty shyǵarmasy batyrdyń tulǵasyn tanytýǵa arnalǵan. Bul eńbekterde batyrdyń ómir joly, el aldyndaǵy qyzmeti men tarıhı kezeńniń kúrdeli oqıǵalary qamtylǵan.
Osyǵan deıin Júrsin Ermannyń 75 jyldyq mereıtoıyna oraı ulytaýlyqtar aqynǵa kólik tartý etkenin jazǵanbyz.
