Astanada zııaly qaýym ókilderimen kezdesýde qoǵamdaǵy din jáne rýhanııat máseleleri ártúrli qyrynan talqylandy
ASTANA. QazAqparat - 23 sáýirde Almaty qalasyndaǵy Qazaqstan Respýblıkasynyń Ulttyq kitaphanasynda QR Din isteri agenttiginiń tóraǵasy M.Ázilhanovtyń jáne Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyulynyń «Din birligi - ult tutastyǵynyń kepili» atty zııaly qaýym ókilderimen kezdesýi ótti.
Bul týraly Din isteri agenttiginiń baspasóz qyzmeti habarlady.
Kezdesýge Qabdesh Jumadilov, Serik Qırabaev, Sultan Sartaev, Murat Áýezov, Marfýǵa Aıthojına, Temirhan Medetbek jáne t.b. ádebıet, óner, ǵylym qaıratkerlerinen quralǵan zııaly qaýym ókilderi qatysty.
Kezdesý zııaly qaýymǵa memleketimizdiń din saıasaty jáne elimizdegi dinı ahýal jóninde, Agenttiktiń din salasyndaǵy ýákiletti organ retindegi qyzmeti men «Dinı qyzmet jáne dinı birlestikter týraly» zańnamanyń júzege asyrylýy jaıynda keńinen túsinik berý maqsatymen uıymdastyryldy. Atalǵan máselelerdi jan-jaqty taldaı otyryp, mazmundy baıandama jasaǵan Agenttik tóraǵasy M.Ázilhanov sonymen qatar zııaly qaýymmen qarym-qatynas aıasyndaǵy keleshek jumys josparymen bólisti.
«Zııaly qaýym ókilderi zamanalar boıy ulttyń ustazy, qoǵamdyq aqyl-oıdyń qozǵaýshy kúshi qyzmetin qaltqysyz atqaryp keledi. Óskeleń jastar sizder jazǵan týyndylar, jasaǵan zertteýler arqyly ózin, ultyn, dástúrin, dúnıetanymyn tanydy, sana-sezimin, oı-órisin, baǵyt-baǵdaryn qalyptastyrdy. Kórkem ádebıet, óner, ǵylym, baspasóz arqyly qoǵamdyq sanany sizder qalyptastyrýdasyzdar dep biz senimmen aıta alamyz. Memlekettik organ retinde bizdiń júrgizip otyrǵan barlyq qoǵamdyq sharalarymyzǵa zııaly qaýym ókilderi de qatysýda. Ult múddesi barshaǵa ortaq bolǵandyqtan men sizderdi osy baǵytta birlese otyryp, belsene jumys júrgizýge shaqyramyn», - dedi M.Ázilhanov óz sózinde.
Kelesi sózdi Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly alyp, qazaq halqynyń ata-dini - ıslamnyń jasampaz qundylyqtaryna, onyń qoǵam ómirindegi mańyzyna keńinen toqtaldy.
Sonymen qatar QR Din isteri agenttigi tóraǵasynyń keńesshisi A.Ábdirásilqyzy din jáne dástúr suhbatynyń zamanaýı syn-tegeýrinder aıasyndaǵy jaı-kúıine toqtalyp, rýhanı qundylyqtar jáne dinı sana tóńireginde oı bólisti.
Pikirtalas barysynda Agenttik tóraǵasynyń orynbasary Ǵalym Shoıkın Elbasynyń jyl saıynǵy halyqqa joldaýynyń strategııalyq baǵyttarymen tanystyryp, memlekettik-konfessııalyq qatynastar salasynyń ózekti máseleleri jóninde tolymdy pikir bildirdi.
Іs-shara barysynda búgingi qoǵamdaǵy din jáne rýhanııat máseleleri ártúrli qyrynan talqylandy. Zııaly qaýym ókilderi tarapynan qoıylǵan ózekti saýaldarǵa jaýap berilip, jan-jaqty pikir almasyldy.
Kezdesý qorytyndysynda Serik Qırabaev, Sultan Sartaev, Amanjol Qoshanov, taǵy basqa zııaly qaýym ókilderi din salasyndaǵy ýákiletti organ jáne múftııat basshylyǵymen ótken kezdesýdi eki jaqty paıdaly shara retinde joǵary baǵalap, dástúrli is-sharaǵa aınaldyrý qajettigin atap kórsetti.
