Astanada jylytylǵan aıaldamalardy ornatý ýaqytsha toqtatyldy
ASTANA. QazAqparat - Elordada jylytylǵan aıaldamalardy ornatý jumystary ýaqytsha toqtatyldy. Bul týraly búgin Ortalyq kommýnıkatsııalar qyzmetindegi baspasóz máslıhatynda «Qalalyq sheshimder bıýrosy» ortalyǵynyń dırektory Dáýren Qaısarov málim etti, dep habarlaıdy QazAqparat.
«Shynynda da qazirgi kezde jylytylǵan aıaldamalardy ornatý jumystary ýaqytsha toqtatyldy. Sebebi, búginde atalǵan pavılondardy ornatýdaǵy qadamdar qaıta qaraldy. Osy kúni bes ınvestor bar jáne olar yntymaqtastyqtyń túrli baǵyttarynda qalalyq keńes aldynda ózderiniń jobalaryn qorǵap otyr. ıAǵnı, bul rette tek aıaldama ǵana emes, sonymen qatar tutas aıaldamalyq keshen qamtylmaq. Onda aıaldama, jol boıyndaǵy servıs mindetti bolady»,-dedi ol.
Osy keshende qoǵamdyq dárethana, jergilikti polıtsııa qyzmetiniń beketi, sondaı-aq qoǵamdyq tamaqtaný oryndary bolady dep kútilýde.
Belgili bolǵandaı, qazirgi kezde birneshe ınvestor Astananyń aýmaǵynda 200-ge jýyq pavılondy ornatýǵa daıyn kórinedi. Aıaldamalar negizinen mektepter men aýrýhanalar sekildi áleýmettik nysandar janynda salynady.
