Astanada jylyna 20 myńǵa jýyq aǵash otyrǵyzylady - I.Tasmaǵambetov
ASTANA. QazAqparat - Astanada jylyna 20 myńǵa jýyq aǵash otyrǵyzylady. Bul týraly búgin Astanada ótken «Biz taza qala úshin» atty jalpyqalalyq senbilik kezinde qala ákimi Imanǵalı Tasmaǵambetov aıtty, dep habarlaıdy astana.kz.
Senbilikke qala turǵyndaryn Astana ákimi Imanǵalı Tasmaǵambetov bastap shyqty. Onyń aıtýynsha, búgin 7 myńǵa jýyq aǵash pen buta otyrǵyzyldy.
«Bárin de sózben ǵana emes, naqty ispen de dáleldeý kerek. Eger jylyna birneshe ret qana senbilikke shyǵyp, aǵash otyrǵyzsań, keıinnen osy baqtyń janynan ótip bara jatyp munda men otyrǵyzǵan aǵash ósip jatyr dep oılaǵanda, qýanbaısyń ba?! Búgin 7 myńǵa jýyq aǵash pen buta otyrǵyzylady. Elordada jylyna 20 myńǵa jýyq aǵash otyrǵyzylady»,- dedi ákim.
Bul rette qala basshysy Astananyń klımaty qatal ekendigin atap ótti. Buǵan qaramastan elordalyq kommýnaldyq qyzmetterdiń arqasynda Astana ósip-ónip, kógaldandyrylýda.
«Astana qalasynyń bastamasymen 65 myń gektar jerge aǵash otyrǵyzylǵanyn biletin shyǵarsyzdar. Qazir óz qolymyzben jasaǵan úlken ormanymyz bar. Árıne, qalanyń klımaty, ekologııasy jáne jalpy jergilikti adamdardyń kóńil kúıi de osy aǵashtardyń kóp bolýyna baılanysty ekeni sózsiz»,- dedi qala basshysy.
Aıta keterligi, búgin elorda kóshelerinde 120 jýyq tıegish pen 340 júk kóligi, barlyǵy 460 kólik pen basqa da mamandandyrylǵan tehnıka jumys istedi. Senbilik barysynda qaladan 2,5 myń tonna qoqys shyǵarylyp, jalpy aýdany 491,4 ga saıabaq pen 220 gúlzar tazartylady. Jalpy, jalpyqalalyq senbilikke 93 myńnan astam adam qatysty.
