Astanada jyly aıaldamanyń jańa nusqasy ornatyldy
ASTANA. QazAqparat - Elordanyń oń jaǵalaýynda Digital euro city formatyndaǵy jańa jyly aıaldama ornatyldy, dep habarlaıdy QazAqparat Saryarqa aýdanynyń ákimi Arman Turlybekke silteme jasap.
«Nazarlaryńyzǵa biregeı joba - Digital euro city formatyndaǵy jańa jyly aıaldamany usynamyz. Jyly aıaldamalarǵa árkim ártúrli kózqarasta, degenmen qoǵamdyq kóliktiń árbir tutynýshysyna, Astana qonaqtaryn esepke almaǵanda, qala turǵyndarynyń 60-70% qolaıly bolý úshin asa yńǵaıly aıaldama nusqasyn ornattyq», - dep jazdy aýdan ákimi óziniń Facebook paraqshasyna.
Aıaldama Kenesary-Saryarqa kósheleriniń qıylysynda ornalasqan. Bul halyq kóp shoǵyrlanǵan aýmaq pen jaqyn mańdaǵy JOO kelýshileri úshin yńǵaıly bolmaq.
Aıaldama 3 sektorǵa bólinedi: birinshisi - kútý zaly, munda jolaýshylar avtobýs kestesimen jáne baǵyttarmen tanysa alady. Taǵy bir artyqshylyqtardyń biri - tegin Wi-Fi (testileý rejiminde), telefon qýattaıtyn kózder men táýlik boıy beınebaqylaý júrgiziledi.
Ekinshi sektor - jabyq kútý zaly. Bul qysqy aıaz ben jazǵy aptap ystyqta úlken suranysqa ıe bolmaq. Zal aýa baptaý jáne jylytý júıesimen jabdyqtalǵan, avtobýstar kestesi men baǵdar kartasy ilingen.
Úshinshi sektor saýda-sattyqqa, mınımarketterge arnalǵan.
«Jyl sońyna deıin dál osyndaı eýropalyq nusqadaǵy 26 aıaldama ornatylady. Ákim tapsyrmasyna sáıkes, mundaı aıaldamalar eń aldymen áleýmettik nysandar mańynda turǵyzylýy tıis», - dep túsindirdi Arman Turlybek.
Odan bólek, kez kelgen tilek bildirýshi eýropalyq jyly aıaldamalardy ornatýǵa ınvestıtsııa quıa alady. Bul úshin «Astana» ÁKK arqyly taǵy 145 oryn ázirlengen, sondaı-aq, ınvestorǵa mınımarket bóligi beriledi.
Kenesary-Saryarqa qıylysynda ornatylǵan aıaldama jeke ınvestor esebinen turǵyzylǵan.
