Astanada jylý energııasyna tarıf arzandaıdy
ASTANA. QazAqparat - Astanada jylý energııasynyń baǵasy arzandaıdy, dep habarlaıdy QazAqparat tilshisi «Astana-Energııa» AQ jáne «Astana-Jylýtranzıt» AQ baspasóz qyzmetterine silteme jasap.
«Astana-Energııa» AQ men «Astana-Jylýtranzıt» AQ basshylyǵy Astana qalasy ákimdiginiń usynystaryn nazarǵa ala otyryp jáne tutynýshylarǵa tarıfterdiń jıi ózgerý faktorlarynyń áser etýin, sondaı-aq tarıftik saıasat pen teńgerim múddesin turaqtandyrý qajettigin eskerip, 2018 jylǵy 1 qańtardan 30 maýsym aralyǵynda jylý energııasyn óndirý, taratý jáne úlestirý tarıfterin tómendetý týraly sheshim qabyldady», - delingen aktsıonerlik qoǵamdardyń baspasóz qyzmeti taratqan habarlamada.
Málim etilgendeı, tutynýshylar úshin jylý energııasynyń baǵasyn túsirý, tarıfti 2017 jyldyń deńgeıinde qaldyrý arqyly qamtamasyz etilmek.
Aıta keteıik, Tabıǵı monopolııalardy retteý komıtetiniń Astana qalasy boıynsha departamenti 2017 jyldyń 21 qarashasy kúni 5 jyl merzimge «Astana-Energııa» AQ úshin tarıftiń shekti deńgeıin bekitken bolatyn:
2018 jyl - 1 777 teńge/Gkal (QSQ esebinsiz);
2019 jyl - 1 860 teńge/Gkal (QSQ esebinsiz);
2020 jyl - 1 892 teńge/Gkal (QSQ esebinsiz);
2021 jyl - 1 914 teńge/Gkal (QSQ esebinsiz);
2022 jyl - 1 980 teńge/Gkal (QSQ esebinsiz).
Sondaı-aq Tabıǵı monopolııalardy retteý komıtetiniń Astana qalasy boıynsha departamenti 2017 jyldyń 29 qarashasynda 5 jyl merzimge «Astana-Teplotranzıt» AQ úshin jylý energııasyn berý men úlestirý tarıfiniń shekti deńgeıin bekitti:
2016 jyl - 1 070 teńge/Gkal (QSQ esebinsiz);
2017 jyl - 1 131 teńge/Gkal (QSQ esebinsiz);
2018 jyl - 1 204 teńge/Gkal (QSQ esebinsiz);
2019 jyl - 1 277 teńge/Gkal (QSQ esebinsiz);
2020 jyl - 1 346 teńge/Gkal (QSQ esebinsiz).
Bul rette, «Astana-Energııa» 2018 jyldyń birinshi jartyjyldyǵynda jylý energııasyn óndirýge tarıfti 1777,14 teńgeden 1 745,63 teńgege deıin jáne «Astana-Jylýtranzıt» jylý energııasyn taratý men úlestirý tarıfin 1204 teńgeden 1 131,39 teńgege deıin azaıtý týraly sheshim qabyldady.
«Tarıfterdi tómendetý nátıjesinde «Astana-Energııa» AQ-nyń 2018 jyldaǵy tabysy 112 mln teńgege, «Astana-Jylýtranzıt» AQ tabysy - 220 mln teńgege azaıady. Alaıda bul 2018-2022 jyldardaǵy ınvestıtsııalyq baǵdarlamalardy júzege asyrýǵa áser etpeıdi. Kiristerdiń tómendeýi ózge qyzmetten túsken tabystarmen jáne shyǵyndardy ońtaılandyrý arqyly óteledi. Osylaısha, Astana qalasynyń tutynýshylary úshin 2018 jyldyń birinshi jartyjyldyǵynda jylý energııasyn óndirý jáne taratý tarıfteri 2017 jyldyń deńgeıinde qalatyn bolady», - delingen habarlamada.
2018 jylǵa arnalǵan ınvestıtsııalyq baǵdarlama tolyq kólemde júzege asyrylady.
