Astanada jylý berý maýsymy qashan aıaqtalady
ASTANA. QazAqparat - Elordada jylý berý maýsymynyń aıaqtalý merzimi mamyr aıynyń ortasyna deıin sozylýy múmkin. Bul týraly búgin Astana qalasynyń otyn-energetıkalyq kesheni jáne kommýnaldyq sharýashylyq basqarmasynyń basshysy Erbol Tóleýov aıtty, dep habarlaıdy QazAqparat.
«Astanada jylý berý maýsymyna oraı arnaıy shtab uıymdastyrylǵan. Ony qala ákiminiń orynbasary Qosman Aıtmaǵambetov basqarady. Qys boıy atalǵan shtabta kóterilgen máseleler dereý qaralyp, qatań baqylaýda boldy. Nátıjesinde qysty aman-esen ótkizdik. Al jylýdyń osy kúnge deıin berilýine qatysty aıtar bolsam, qalalyq máslıhat qabyldaǵan arnaıy sheshim bar. Soǵan sáıkes qysqy jylý berý maýsymynyń aıaqtalýy úshin aýa raıy turaqtalýy tıis. ıAǵnı, 5 táýlik boıy ortasha aýa temperatýrasy +10 gradýs jyly bolýy qajet», - dedi ol BAQ ókilderine bergen suhbatynda.
Onyń atap ótýinshe, qazirgi ýaqytta temperatýra +10 gradýstan tómen bolýyna baılanysty elorda ákimdigi aýa raıy turaqtalǵansha jylý berý maýsymyn sozý týraly sheshim qabyldanǵan.
«Naqty derekterge sáıkes, 9 mamyrǵa deıin aýa raıynda turaqsyzdyq saqtalyp, temperatýra áli de tómendeıdi. 9 mamyrdan keıin ǵana turaqty jyly bolady», - dedi basqarma basshysy.
Sonymen qatar ol turǵyndardyń jylýǵa energııany bosqa shyǵyndap jatyrmyz degen shaǵymyna da naqty jaýap berdi.
«Jalpy, bul kez kelgen turǵynnyń jáne qyzmet kórsetýshi kompanııalardyń, ıaǵnı páter ıeleri kooperatıvteriniń quqyǵy. Olar ózderiniń PIK-terine júginip, retteı alady. Biz energııa tasymaldaýshy retinde jylý berý maýsymy aıaqtalmaıynsha ony óshire almaımyz. Al medıtsınalyq, bilim berý mekemeleri basqa sanatqa jatady. Olarǵa qatysty sheshim derbes qabyldanady», - dedi Erbol Tóleýov.
Foto: netsmol.ru
