Astanada jyldyń úzdik ónertapqyshtary anyqtalady
ASTANA. QazAqparat - Astanada QR zııatkerlik menshik salasynyń mańyzyn arttyrý, ónertapqyshtar men olardyń ónertabystaryn kópshilikke tanytý maqsatynda ónertapqyshtyq salasyndaǵy jetistikterdiń «Shapaǵat» jyl saıynǵy respýblıkalyq baıqaýy ótkiziledi. Bul týraly qalalyq Ádilet departamentiniń baspasóz qyzmetinen habarlaıdy dep jazady elorda ákimdiginiń resmı saıtynda.
Jeńimpazdar «Jyl ónertabysy», «Ónertapqysh áıel», «Jyldyń eń jas ónertapqyshy», «Jyldyń eń belsendi ónertapqyshy», «Jas daryn» nomınatsııalary boıynsha anyqtalady.
Baıqaý sheńberinde «Jas daryn» nomınatsııasyna erekshelik belgileri bar, eń perspektıvti zerttemelerge jatatyn ǵylymı-zertteý jumystaryn jazǵan 14-18 jas aralyǵyndaǵy oqýshylar men stýdentter qatarynan úmitker irikteledi. Osy nomınatsııaǵa ınnovatsııalyq patent nemese patentpen qorǵalmaǵan ǵylymı jumystarmen qatysýǵa bolady.
Jeńimpazdar «Shapaǵat» baǵaly músinimen jáne aqshalaı syılyqtarmen, zııatkerlik menshiktiń dúnıejúzilik uıymynyń nagradasymen jáne V.I.Blınnıkov atyndaǵy «Ónertapqyshtyq jáne patenttik iske qosqan úlesi úshin» Eýrazııalyq patenttik vedomstvonyń altyn belgisimen marapattalady.
Jeńis tuǵyrynan kóringen daryndy jandardy saltanatty marapattaý rásimi Astana qalasynda VІІ Astana ekonomıkalyq forýmynyń ІІ «Antıkontrafakt» Halyqaralyq forýmynyń aıasynda 2014 jyldyń 22 mamyrynda ótkiziledi.
«Baıqaýǵa qatysý úshin ótinimder 2014 jyldyń 1 sáýirine deıin qabyldanady. Nıet bildirgender baıqaý týraly aqparatty Astana qalasynyń Ádilet departamentiniń Zııatkerlik menshik quqyqtary jónindegi bólimine habarlasa alady: Astana qalasy, Jeńis dańǵyly 15, tel, faks: 8 (7172) 321-787, e-mail: intell-ast@mail.ru» , - dep habarlaıdy vedomstvo qyzmetkerleri.
