Astanada jyldyń sońyna deıin taǵy 5 qoljetimdi turǵyn úı paıdalanýǵa beriledi - ákim orynbasary S.Horoshýn
ASTANA. 22 qazan. QazAqparat - Aǵymdaǵy jyldyń sońyna deıin biz «Qoljetimdi baspana - 2020» baǵdarlamasy aıasynda taǵy 5 turǵyn úı keshenin paıdalanýǵa beretin bolamyz. Bul týraly Mınıstrler kabınetiniń búgingi otyrysynda Astana qalasy ákiminiń birinshi orynbasary Sergeı Horoshýn málim etti.
Onyń habarlaýynsha, osy ýaqytqa deıin Astanada turǵyn úı qurylys jınaq júıesi boıynsha 420 páterli bir kóppáterli úı paıdalanýǵa berildi. Oǵan qosa, jalpy 1633 páteri bar 8 turǵyn úıdiń qurylysy atqarylyp jatyr. «Aǵymdaǵy jyldyń aıaǵyna deıin biz taǵy 5 úıdi paıdalanýǵa berýdi kózdep otyrmyz. Memlekettik komıssııa eki nysannyń aktisin osy aıda rásimdese, kelesi aıda - bir, al jeltoqsanda taǵy eki turǵyn úıdiń qujattaryna qol qoıylady», - deıdi S.Horoshýn.
Ákim orynbasary atap kórsetkendeı, Astanada paıdalanýǵa beriletin baspana kóleminiń azaıýy turǵyn úı keshenderiniń bárin tolyqqandy daıyn kúıinde qabyldaý talaptaryn engizýmen tyǵyz baılanysty.
