Astanada jyldyń aıaǵyna deıin 400-den astam aýla abattandyrylady
ASTANA. 24 maýsym. QazAqparat - 2013 jyldyń aıaǵyna deıin elordada 400-den astam aýla aýmaǵy abattandyrylady.
Bul týraly astana.kz saıtyna Astana qalasy ákimi apparatynyń Ómir tirshiligin qamtamasyz etý jáne ınfraqurylym bóliminen málim etti.
«2013 jyldyń aıaǵyna deıin Astanada 402 aýla abattandyrylatyn bolady. Atap aıtqanda, Saryarqa aýdany boıynsha - 260, Almaty aýdany boıynsha - 106 jáne Esil aýdany boıynsha - 36 aýlany abattandyrý josparlanǵan, - dep habarlaıdy qalalyq ákimdikten.
Qazir abattandyrylýǵa tıisti barlyq aýlalarda jóndeý jumystary júrgizilip, jol jıekteri, jaıaý júrginshiler joly, rettelýde. Sonymen qatar, dekoratıvti qorshaýlar ornatylyp, balalardyń oıyn jáne sport alańshalary qalypqa keltirilýde.
Saryarqa aýdanynda: Jeltoqsan, Aǵybaı batyr, Jangeldın, Potanın, Birjan sal, Gete, Myńaral, Talapker, Máskeý, Jarsýat, K.Baıseıitova, Chehov, Qartaly, Aqbuǵy kósheleri men Jeńis, Respýblıka, Saryarqa dańǵyldaryndaǵy aýlalar abattandyrylady.
Esil aýdanynda Syǵanaq, Dostyq, Saraıshyq kósheleri men Jańa áýejaı, Túrkistan, Qabanbaı batyr dańyldaryndaǵy aýlalarda jumys qarqyn alǵan.
Almaty aýdanynda jyldyń aıaǵyna deıin 106 aýla, 106 balalar alańy, 34 sport alańy jabdyqtalyp, 632 qoqys jáshigi, 701 oryndyq pen 84 shatyr oryndyq ornatylmaq. 128 sharshy metr jerge jańadan asfalt tóselip, aýdan turǵyndarynyń jaılylyǵy úshin 3 myńnan asa avtoturaq orny ashylady.
