Astanada jyldamdyq ólsheıtin jańa apparattar áli qosylǵan joq - Astana ІІD

ASTANA. QazAqparat - Elorda aýmaǵyndaǵy jyldamdyq ólsheıtin jańa sur apparattar áli qosylǵan joq. Bul týraly búgin Astanada ótken baspasóz máslıhatynda qalalyq ІІD bastyǵynyń orynbasary Batyrlan Esenbaı málim etti.

«Jyldamdyq ólsheıtin sur apparattar áli de qosylǵan joq. Ony iske qosý úshin qaladaǵy ózge júıemen ózara qosylýy qajet. Kem degende shamamen bir aıdyń ishinde bul apparattar jumysyn bastaýy yqtımal»,-dedi B. Esenbaı.

Onyń sózine qaraǵanda, qala aýmaǵynda ornatylǵan jyldamdyq ólsheıtin sur apparattar qazirgi kezde testilik rejimde jumys istep tur. Alaıda, olar boıynsha aıyppul salý sharalary júzege asyrylyp jatqan joq.

«Bul apparattardyń tıimdiligi bar. Qala boıynsha 35-ke tarta osyndaı ólshegishter ornatyldy. Qazirgi kezde bulardy bizdiń málimetter bazasyna qosý sharalary atqarylýda. Ázirge bul apparattardy qosý úshin sertıfıkatsııa bolmaı tur. Sertıfıkatsııa bolǵan kezde olar bizge qosylady jáne halyqty osy jaıynda eskertetin bolamyz»,- dedi B. Esenbaı.