Astanada jyl sońyna deıin jańa alty balabaqsha paıdalanýǵa beriledi
ASTANA. QazAqparat - Jyl sońyna deıin Astana qalasynyń ınfraqurylymy jańa alty balabaqshamen tolyǵady. Bul mektepke deıingi bilim mekemeleri jalpy sany 1400 balaǵa eseptelgen. Astana qalalyq Qurylys basqarmasynyń habarlaýynsha, qazan aıynyń sońyna deıin tórteýi óz jumysyn bastaıtyn bolady.
Atap aıtqanda, Túrkistan, Kereı, Jánibek han jáne Orynbor kósheleriniń kvartalyndaǵy, Almaty men Aqmeshit kósheleriniń qıylysyndaǵy balabaqshalar qurylysy aıaqtalmaq. Aınakól men Mırzoıan kósheleriniń jáne Nájimedenov pen Mırzoıan kósheleriniń qıylystaryndaǵy nysandardyń qurylysy da aıaqtalyp keledi. Jańadan ashylatyn balabaqshalardyń árqaısysy 240-qa jýyq balany qabyldaı alady. Sonymen qatar bıyl qarasha aıynda Túrkistan men Orynbor kósheleriniń qıylysynda №25 jáne №26 (200 oryndyq), sondaı-aq Aınakól men Jumabaev kósheleriniń qıylysynda (240 oryndyq) eki balabaqsha ashylady, dep habarlanǵan elorda ákimdiginiń resmı saıtynda.
