Astanada jyl sońyna deıin turǵyn úı baǵdarlamasy aıasynda 3,5 myń páter tapsyrylady
ASTANA. 25 qyrkúıek. QazAqparat - Búgin Astanada besinshi shaqyrylǵan qalalyq máslıhattyń kezekti sessııasy óz jumysyn bastady.
Sessııanyń qaraýyna elordadaǵy turǵyn úı qurylysynyń jaı-kúıi men ony damytý bolashaǵy máseleleri shyǵaryldy.
Atalǵan máselege oraı máslıhat aldynda baıandama jasaǵan elorda ákiminiń birinshi orynbasary Sergeı Horoshýn 2008-2010 jyldarǵa arnalǵan memlekettik turǵyn úı baǵdarlamasy boıynsha Astanada jyl sońyna deıin 3,5 myń páter tapsyrý josparlanǵanyn atap ótti. «2008-2010 jyldardaǵy baǵdarlamanyń ekinshi kezeńin aǵymdaǵy jyldyń sońyna deıin aıaqtaýdy josparlaımyz. Bul rette jalpy aýdany 206 myń sharshy metrdi quraıtyn 3 myń 496 páterli 16 turǵyn úı kesheni salynatyn bolady», - dedi S. Horoshýn.
Ákim orynbasarynyń aıtýynsha, memlekettik baǵdarlama aıasynda búgingi kúnge deıin jalpy aýdany 230 myń sharshy metrdi quraıtyn 5 myń 86 páter tapsyrylǵan.
«Sonyń arqasynda baǵdarlamaǵa qatysýshy 8 myń 855 otbasy baspanaly boldy. Al jalpy paıdalanýǵa berilgen turǵyn úılerdiń quny 25,8 mlrd. teńgeni qurap otyr», - deıdi S. Horoshýn.
