Astanada jyl sońyna deıin birqatar balabaqshanyń qurylysyn bastaý josparlanýda
ASTANA. 6 sáýir. QazAqparat - Astana qarqyndy damyp kele jatqan qala. Jyl saıyn elorda halqy ondaǵan myń adamǵa ósip otyrady.
Soǵan sáıkes halyqtyń mektep pen balabaqshalarǵa, basqa da áleýmettik mańyzdy nysandarǵa qajettiligi ósýde.
Búgingi kúni qalada balabaqsha kezeginde 70 myńǵa tarta bala tur. Osyǵan baılanysty qala ákimdigi mektepke deıingi mekemeler qurylysyn salyp, burynǵylaryn keńeıtý maqsatynda aýqymdy jumystar júrgizýde.
2013 jyldyń basynan beri elordada 480 oryndyq 2 balabaqsha qurylysy bastaldy. Bıylǵy jyly taǵy da 1540 oryndyq 7 balabaqsha turǵyzý josparlanýda. Sonymen qatar Kúıgenjar aýylynda burynǵy mekteptiń ǵımaratyn 100 oryndyq balabaqshaǵa yńǵaılap, jańartý uıǵarylǵan. Bul týraly astana.kz saıtyna Astana qalasynyń Bilim basqarmasynan málim etti.
Budan bólek, vedomstvonyń aqparaty boıynsha, qalada 1920 oryndyq 8 balabaqsha qurylysy jalǵasýda.
Bıylǵy jyly Esil aýdanynda Almaty, Aqmeshit kósheleriniń qıylysynda, Saýran men №24 kóshede jáne Syǵanaq pen Orynbor, sondaı-aq №36 kósheler qıylysynda 960 oryndyq 4 balabaqsha salyný ústinde.
Almaty aýdanynda da bıylǵy jyly 520 oryndyq eki balabaqsha Internatsıonalnyı kentindegi Daýylpaz-Aqyrtas kóshelerinde aıaqtalýy josparlanǵan.
Sondaı-aq, bıylǵy jyly 440 oryndyq taǵy 2 balabaqsha qurylysyn Saryarqa aýdanynyń Seıfýllın kóshesi men Kóktal-2 turǵyn úı alabynda aıaqtaý kózdelgen.
