Astanada jyl sońyna deıin 30 jeke menshik balabaqsha ashylady
ASTANA. QazAqparat - Astanada jyl sońyna deıin 30 jeke menshik mektepke deıingi bilim berý mekeme ashylady. Bul týraly «Bilimdi el - máńgi el» taqyrybynda ótken bilim qyzmetkerleriniń tamyz keńesi barysynda Astana ákimi Áset Isekeshev málim etti.
Boljamdarǵa sáıkes, 2019 jylǵa qaraı Astanada 3-ten 6 jasqa deıingi balalar sany shamamen 65 myńǵa jetedi. Kishkentaı elordalyqtardy mektepke deıingi bilimmen 100% qamtý úshin qosymsha 26 myńǵa jýyq oryn ashý kerek. Osy maqsatta memlekettik jáne jeke menshikti 200-den astam nysan ashý josparlanǵan, dep habarlaıdy elordalyq ákimdiktiń baspasóz qyzmeti.
«2016 jyldyń 1 shildesinen bastap jeke menshik mektepke deıingi uıymdarda memlekettik bilim berý tapsyrysynyń quny bir bala úshin 15 900 teńgeden 23 000 teńgege deıin ulǵaıtyldy. Bul rette ata-analar 23 000 teńgeniń ornyna 20 800 teńge tóleıtin boldy. Osylaısha, ata-analarǵa túsetin júkteme azaıtyldy, memlekettik jáne jeke menshikti balabaqshany tańdaý kezinde balama paıda boldy jáne qyzmetter quny teńesti, - dedi Á. Isekeshev.
Jeke menshikti balabaqshalar sanyn memlekettik-jeke menshik seriktestik jáne qalada balabaqshalar ashýǵa nıetti kásipkerlerge jaǵdaı jasaý arqyly arttyrýǵa bolady.
