Astanada jyl saıyn júzdegen ana men sábı ólimnen qutqarylady
ASTANA. QazAqparat - Astana qalasynyń Densaýlyq saqtaý basqarmasy bosanatyn áıelder men nárestelerge shuǵyl kómek qajet bolǵan jaǵdaıda barlyq qurylymdar ózara naqty reglamentter boıynsha jumys isteıtinin aıtty. Bul týraly QazAqparat tilshisi vedomstvonyń baspasóz qyzmetine silteme jasap habarlaıdy.
Málim etilgendeı, Densaýlyq saqtaý basqarmasynda basshynyń ana men bala densaýlyǵyn qorǵaý jónindegi orynbasary laýazymy bar.
Budan bólek, bul máselemen ana men bala densaýlyǵyn qorǵaý bóliminiń basshysy jáne mamandary, basqarmanyń shtattan tys mamandary, akýsher-gınekologııalyq qyzmet jónindegi mamandar da aınalysady.
Ana jáne náresteler ólimi jónindegi shtab jumys isteıdi. Ana men bala densaýlyǵyn saqtaý máseleleri qaralatyn jáne júıeli sheshimder qabyldanatyn otyrystar turaqty negizde ótkizilip turady.
«Aýyr jaǵdaılar týyndaǵan kezde konsılıýmdar shaqyrylyp, Ulttyq ana men bala ortalyǵynan, Ulttyq kardıohırýrgııa ortalyǵynan, «Astana» Medıtsına ýnıversıteti kafedralarynan professorlar men sarapshylar shaqyrylady (...) Mamandardyń úılesimdi áreketteriniń arqasynda jyl saıyn júzdegen kelinshek pen sábıdiń ómirin saqtap qalý múmkin bolyp otyr», - dep jaýap berdi baspasóz qyzmetiniń ókideri QazAqparat tilshisiniń saýalyna.
Eske sala keteıik, sońǵy eki aıda elordada jańa bosanǵan tórt áıel kóz jumǵan bolatyn. 21 maýsym kúni Astanadaǵy №1 perınataldyq ortalyqta 34 jastaǵy áıel, 25 maýsymda 31 jastaǵy áıel qaıtys boldy. «Birinshi jaǵdaıda kelinshek balany ózi bosandy, al ekinshi jaǵdaıda kesar tiligi jasaldy. Ekeýi de osyǵan deıin bosanǵan áıelder. Sonymen qatar olardyń júktilikke baılanysty emes aýrýlary bolǵan», - degen bolatyn Astana qalasy qoǵamdyq densaýlyq saqtaý basqarmasy basshysy orynbasarynyń mindetin atqarýshy Sáýle Muqysheva.
3 shilde kúni taǵy bir kelinshek kóz jumdy. №1 perınataldyq ortalyqtyń bas dárigeriniń orynbasary Erbol Áýbákirov kelinshek óliminiń akýsherlik qıyndyqtarmen baılanysty bolǵanyn aıtty. Kelinshektiń 19 jasynan bastap zııandy ádetteri bolǵan.
Tórtinshi jaǵdaı 16 shildede №2 perınataldyq ortalyqta tirkeldi.
