Astanada jyl saıyn shamamen 15 mektep salynýy tıis
ASTANA. QazAqparat - 2017 jyly Astanaǵa óńirlerden shamamen 80 myń adam kóship kelgen, onyń 17 myńy balalar. Bul áleýmettik júıege jáne mektepke qosymsha júkteme túsirip otyr. Osy máseleni sheshý úshin Astanaǵa jyl saıyn shamamen 15 mektep salynýy tıis, dep habarlaıdy QazAqparat qala ákimdiginiń saıtyna silteme jasaı otyryp.
Bul máseleni 2015-2017 jyldarǵa arnalǵan «Nurly jol» baǵdarlamasynyń «Áleýmettik ınfraqurylymdy damytý» baǵytyn júzege asyrý boıynsha respýblıkalyq bıýdjetten jáne Ulttyq qordan bólingen qarajatty maqsatty ıgerýge arnalǵan «Nur Otan» fraktsııasynyń janyndaǵy jıynda talqylady. Bilim jáne ǵylym vıtse-mınıstri Bıbigúl Asylovanyń aıtýynsha, úsh aýysymdy mektepterdiń paıda bolýy ol demografııalyq jáne kóshi-qon máselesine baılanysty.
«Qazaqstandaǵy halyq sanynyń ósimi jyl saıyn 230 myń adamdy quraıdy. Onyń ishinde Astana, Almaty, Shymkent jáne Almaty men Túrkistan oblysyndaǵy tabıǵı jáne kóshi-qon máselesine baılanysty jyl saıyn halyq ósimi 40-50 myńdy quraýda. Sol sebepti, áleýmettik ınfraqurylym osy sharalarǵa úlgermeýde. Óıtkeni, elimizde jyl saıyn respýblıkalyq bıýdjet esebinen 10 mektep salyný kerek, al Astanada 15 mektep», - dedi ol. Osy jerde ol ınvestorlardy mektep salýǵa yntalandyrý kerek dedi. Úshjyldyq bıýdjet sheńberinde jeke sektorǵa bilim berý obektileriniń qurylysy boıynsha, stýdenttik jataqhana qurylys jobasyna uqsas ótemaqy tólemderi kózdeledi. «Qazir barlyq aımaqta mektep salýǵa qyzyǵýshylyǵy bar bıznesmender bar, biz osy baǵytta jumys jasap jatyrmyz», dedi B. Asylova.
