Astanada jyl saıyn 30 myń bala dúnıege keledi
ASTANA. QazAqparat - Dárigerlerdiń sapalyq kórsetkishinde birqatar másele bar. Bul týraly búgin qala halqynyń aldynda esep berip jatqan Astana ákimi Baqyt Sultanov aıtty, dep habarlaıdy QazAqparat tilshisi.
«Jany saýdyń - táni saý» deıdi qazaq. Dárigerler - eńbegi kóp elene bermeıtin salanyń ókilderi ekenin bilesizder. Alaıda, bir sát oılanaıyqshy! Olar - kún saıyn túrli taǵdyrlarmen betpe-bet keletin qaısar jandar emes pe? Ómir men ólimniń arasynda jantalasyp jatqan naýqasty azabynan qutqaratyn qaharmandar - mine, osylar ǵoı. Ras, medıtsına salasynda, ásirese, qalalyq emhanalarda kadr tapshylyǵy, qyzmetkerlerdiń sapalyq kórsetkishi boıynsha birqatar máseleler bar. Biraq, biz osy problemalardy jeńý úshin birqatar qadamdar jasadyq», - dedi qala basshysy.
Osy oraıda, ol emhana dárigerleriniń kásibıligin kóterý jáne azamattarmen qarym-qatynas sheberligin nyǵaıtýǵa baǵyttalǵan semınarlar ótkizilip jatqandyǵyn aıtty. Sonymen qatar medıtsına salasynda ólim-jitim kórsetkishin tómendetý, tıimdi emdeý úshin ınfraqurylym qurý, kadrlarǵa áleýmettik paket berý jáne qajetti qural-jabdyqtarmen qamtamasyz etýge basymdyq beriletindigin atap ótti.
«Elordada ólim-jitim kóp bolatyn aýrýlardyń kórsetkishterin aıtarlyqtaı jaqsarta aldyq. Atap aıtqanda qan aınalymy júıesinen bolatyn ólim jitim -18, ınfarktan -9, gıpertonııadan -8 paıyz tómendedi. Bul tsıfrlardyń artynda ondaǵan myń qutqarylǵan ómir tur. Ortasha alǵanda ólim-jitim 10 paıyzdan astamǵa tómendedi. Jyl saıyn elordada 30 myń bala dúnıege keledi», - dedi ol.
