Astanada jyl boıy jumys isteıtin alǵashqy aýylsharýashylyq jármeńkesi ashyldy
«Aýdany 7 myń sharshy metr bolatyn jyly orynda elordanyń, sondaı-aq ózge óńirlerdiń taýar óndirýshileriniń ónimderi usynylady. Azyq-túlik naryq qunynan tómen baǵamen qoıylady», delingen ákimdik málimetinde.
Ár demalys kúnderi tańǵy saǵat 8-den keshki saǵat 5-ke deıin turǵyndar jármeńkede Aqmola, Pavlodar, Qaraǵandy jáne Shyǵys Qazaqstan oblystary taýar óndirýshileriniń, sondaı-aq elordalyq taýar óndirýshilerdiń ónimderin satyp ala alady.
Jármeńkede sıyr etiniń kelisi – 2000 teńge, jylqy eti – 2200 teńge, qazy, jaıa 2500 teńgeden satylady.
«Biz kókónis ósiremiz. Jármeńke týraly estigen bette birden ótinish berdik, endi óz ónimderimizdi osynda shyǵaryp otyramyz. Bizde kókónistiń 18 túri bar, bári jańa pisken jáne baǵalary da qolaıly», – dedi satýshy Rústem.
Aıta keteıik, jármeńkede azyq-túlik ónimderiniń barlyq túri – sút, bakaleıa, shujyq, un, jańa aýlanǵan balyq jáne taǵy basqalary satylady.
«Jármeńke sanıtarlyq normalardy saqtaı otyryp ótkiziledi. Kelýshiler betperde taǵýy, qol gıgıenasyn, áleýmettik qashyqtyqty saqtaýy kerek», - dedi ákimdikten.
Ár aptanyń senbi jáne jeksenbi kúnderi ótetin aýylsharýashylyq jármeńkesiniń mekenjaıy: Prıgorodnyı eldimekeni, Arnasaı kóshesi, 109-ǵımarat.
