Astanada jyl basynan beri «Jumyspen qamtý jol kartasy - 2020» aıasynda 3 myńnan asa adam jumysqa ornalastyryldy

ASTANA. QazAqparat - «Jumyspen qamtý jol kartasy - 2020» baǵdarlamasynyń «Infraqurylym men turǵyn úı-kommýnaldyq sharýashylyqty damytý esebinen jumyspen qamtýdy qamtamasyz etý» birinshi baǵyty boıynsha aǵymdaǵy jyldyń 1 qarashasyndaǵy jaǵdaı boıynsha 8 nysanda jumystar aıaqtaldy dep habarlaıdy Astana qalasy Jumyspen qamtý ortalyǵy.

№ 1 qalalyq balalar aýrýhanasy, №2, 3 jáne 9 qalalyq emhanalar, № 10 mektep-gımnazııa, № 40 orta mektep, Astana qalasy ákimdiginiń «Belgili turaǵy joq adamdarǵa arnalǵan áleýmettik beıimdelý ortalyǵy» KMM qazirgi kezde tolyq rejımde jumys isteýde.

Budan basqa, № 3 qalalyq emhana janyndaǵy jalpy praktıkalyq dárigerler bóliminde jáne «Demeý» otbasylyq medıtsına oqý-praktıkalyq ortalyǵynda jóndeý jumystary jalǵasýda. Jyl basynan beri baǵdarlamanyń arqasynda barlyǵy 144 adam, onyń ishinde Jumyspen qamtý ortalyǵynyń joldamasy boıynsha - 72 adam jumysqa ornalastyryldy.

Sonymen qatar baǵdarlama aıasynda «Jumys berýshiniń qajettilikteri aıasynda oqytý jáne kóshirý arqyly jumysqa ornalasýǵa járdemdesý» baǵyty boıynsha jyl basynan beri 3 117 adam ornalastyryldy. Olardyń 783-i memlekettik qoldaý sharalarymen qamtyldy: jastar tájirıbesine 586 bitirýshi jiberildi, áleýmettik jumys oryndaryna 115 adam ornalastyryldy, qaıta daıarlaý kýrstaryna 82 jumyssyz jiberildi.

Jumyspen qamtý ortalyǵynyń habarlaýynsha, ótinish bergen adamdardyń 34 %-y qyzmet kórsetý jáne saýda salalaryna; 22%-y densaýlyq saqtaý salasyna; 16%-y ónerkásipke; 12%-y qurylysqa; 10%-y bilim berý salasyna jáne 6%-y basqa qyzmet salalaryna ornalastyrylǵan, dep jazady elorda ákimdiginiń resmı saıty.