Astanada jyl basynan beri jaıaý júrginshilerdiń qatysy bar 78 jol apatynan 7 adam qaza tapty
ASTANA. QazAqparat - Astanada sońǵy 7,5 aıda 14 myń jaıaý júrginshige 5 AEK kóleminde aıyppul salyndy, dep habarlady astana.kz.
Búgin astanalyq polıtseıler qala kósheleriniń birine shyǵyp, barlaý ótkizdi. Baıqaǵanymyzdaı, nebary jarty saǵat ishinde jas ereksheligi ár túrli ondaǵan adam jol torabyn kóldeneńinen kesip ótti. Óz ómirine selqos qaraýmen qatar, ózgeniń ómirine qaýip tóndirýge baratyn júrginshilermen túsindirý jumystary júrgizilip, shalys basqannyń nátıjesi jaqsylyqqa aparmaıtyny jaıynda beınerolık kórsetildi. «Jol-patrýldik polıtsııa qyzmetkerleri kún saıyn 50-70 deıin jaıaý júrginshilerdiń jol júrý erejesin buzý faktilerin anyqtaıdy. Ol kisilerge QR Ákimshilik kodeksiniń 473 babyna sáıkes, 5 AEK kóleminde aıyppul salynady. Birinshi ret ákimshilik aıyppulǵa tartylǵan kezde bul jaǵdaı taǵy qaıtalanatyn bolsa, 15 AEK kóleminde aıyppul salynyp nemese 3 táýlikke ákimshilik qamaýǵa alynatynyn eskertemiz.», - dedi Astana qalasy ІІD ÁPB ınspektory Qýanysh Erkinov Onyń aıtýynsha, jyl basynan beri jaıaý júrginshilerdiń qatysy bar 78 jol-kólik oqıǵasy boldy. Onda 7 adam qaza taýyp, 72 adam ár túrli jaraqat alǵan.
