Astanada jyl basynan beri jarylǵysh zat qoıylǵany týraly 7 jalǵan habarlama túsken
ASTANA. QazAqparat - Jyl basynan beri Astana qalasy Іshki ister departamentine jarylǵysh zat qoıylǵany týraly 7 jalǵan habarlama kelip tústi. Jurtty áýre-sarsańǵa salǵan buzaqylar izin sýytpaı anyqtalyp, tıisti jazasyn alýda, dep jazady «Astana aqshamy» gazeti.
Astana qalasynyń tártip saqshylary sońǵy 2 jyl ishinde atalǵan qylmys túrin tolyqtaı áshkereleýge qol jetkizgenin aıtady. Mysaly, byltyr 16 qańtarda №8 orta mektepte jarylǵysh qurylǵy qoıylǵany týraly habarlaǵan «telefon terrorısi» 20 jastaǵy jumyssyz júrgen bozbala ekeni anyqtaldy. Oqıǵa ornyna arnaıy quram, TJ qutqarý qyzmeti, jedel járdem, órtke qarsy qyzmet, jedel tergeý toby alyp ushyp jetken. Kınologtar men jarýshy tehnıkter mektep ǵımaratyn túgeldeı tintip shyqsa da, eshqandaı jarylǵysh zat tabylmady. Jedel-izdestirý sharalarynyń barysynda terrorızm aktisi týraly habarlaǵan jigit 1993 jyly týrǵan Jumabek Qabdenov bolyp shyqty. Jaýap alý barysynda ol óz kinásin tolyqtaı moıyndady. Tergeý nátıjesi boıynsha QR Qylmystyq kodekstiń 242-baby, 1- tarmaǵy boıynsha is qozǵaldy. Ol tekke dúrliktirý nátıjesinde memleketke 310 myń teńge shyǵyn keltirgen. Sot sheshimi boıynsha «oınap júrip, ot basqan» jigit 3 jylǵa bas bostandyǵynan aıyryldy.
Sol sekildi, M.Sadyrbaev degen azamat qonys kolonııasyna 6 aı jazasyn óteýge kesildi, budan bólek odan 394 213 teńge kóleminde shyǵyn óndirildi.
2013 jyly 20 mamyrda, tańǵy saǵat 07.00-de Kongress-holl ǵımaratynda jarylǵysh qurylǵy qoıylǵany týraly habarlanady. Aq tańda alashapqyn bolǵan elordalyq polıtsııa qyzmetkerleri eki saǵat ishinde Jambyl oblysynyń turǵyny, 1985 jyly týylǵan Murat Sadyrbaevty ustaıdy. Bir qyzyǵy, mundaı buzaqylyqqa burymdylar da barady. Qaraǵandynyń týmasy, 1991 jylǵy Irına Blıýmniń byltyr tamyzda «Stýdentter emhanasy kúl-talqan bolady» dep 102 nómirin júreksinbeı terýi aqyry aıaǵynda óz basyna pále bop jabysty. Jaza basqan «jalǵan terrorıst» 435 myń teńge kóleminde aıyppul tólep, 1 jylǵa bas bostandyǵynan aıyryldy.
Statıstıkaǵa súıensek, terrorızm aktisi jónindegi jalǵan habarlamalardy kóp jaǵdaıda esirtkige esirgen nemese alkogolge mastanǵan, psıhologııalyq aýytqýǵa ushyraǵan jasóspirimder jasaıdy.
Alaıda, ishinara jeke bas sebepterimen (ushaqqa keshigý, baqtalastaryna nemese qaryzgerlerine keleńsiz jáıt týdyrý, basshylyqqa kektený, renjitken adamnan ósh alý) nemese ásheıin terrorıstik qaýipke áreket etý júıesin tekserip kórýge áýestikpen jaýapsyz qareketke baratyn jandar da kezdesip qalady.
«Qaperińizde ustańyz! Іshki ister departamenti terrorızm aktisi jóninde jalǵan habar taratý qoǵamdyq tártip pen qaýipsizdik qarsy qylmys retinde Qylmystyq kodekstiń 242-baby boıynsha qýdalanatynyn eskertedi. Qazir atalmysh bap barynsha qatańdatyldy. Buǵan deıin bap sanktsııasy 200-den 500 AEK kólemindegi aıyppul salyp, 1-2 jyl túzetý jumystaryn, 6 aılyq tutqyndaý ne bolmasa eki jylǵa jetpeıtin merzimge túrmege toǵytý jazasyn qarastyrsa, endi qolǵa túskendi zań aıamaıdy: sol kólemdegi aıypul tóletedi (890 myń teńge) nemese jeti jylǵa deıin bas bostandyǵyn shekteý, alty jylǵa deıin bas bostandyǵyn aıyrý jazasyna kesedi», dep jazady elordalyq basylym.
