Astanada jyl basynan beri bos oryndar jármeńkesi arqyly 3 myńǵa jýyq adam jumysqa ornalasty
- Bes bos jumys oryndary jármeńkesiniń qorytyndysy boıynsha 175 adam jumysqa ornalastyryldy. Tıisti jumystar jalǵasýda. Búgingi sharaǵa 30 jýyq jumys berýshi qatysýda, sonyń ishinde, bıýdjettik uıymdar men jeke menshikti kompanııalar. Negizinen, qyzmet kórsetý salasyndaǵy, sondaı-aq, óndiristik kompanııalar, taǵam ónimderin shyǵaratyn kompanııalar, qonaq úıler men meıramhanalar, balabaqshalar men emhanalar, - dedi Astana qalasy Jumyspen qamtý ortalyǵynyń dırektory Oljas Omar.
Jumys izdeýshiler de, jumys berýshiler de bos oryndar jármeńkesiniń mańyzdylyǵyn atap ótti. Elordalyq Jumyspen qamtý ortalyǵynyń uıymdastyrýymen ótkiziletin sharalardyń arqasynda jeke menshikti jumys berýshiler kóp ýaqyttaryn jumsamaı ózderine laıyqty jumyskerlerdi taba alady.
- Biz Astana qalasynyń dúkenderine azyq-túlik jetkizýmen aınalysamyz. Bos oryndar jármeńkesi asa ózekti, munda qyzmetimizdiń tutynýshylarymen tikeleı tildesemiz. Atalǵan sharaǵa udaıy qatysyp júremiz, jumyskerlerimizdiń 40% «Jumyspen qamtý ortalyǵy» arqyly kelgender. Ár jármeńkede 30-ǵa jýyq adam alynady, - deıdi «Mır krýp» JShS kommertsııalyq dırektory Muhamedıar Saýdegerov.
Jyl basynan beri bos oryndar jármeńkesiniń arqasynda 2 858 adam jumysqa ornalastyryldy. Bári de ózine laıyq jumys taba aldy. Atap aıtqanda, 998 adam qoǵamdyq jumystarǵa kiristi, 411-i kásiptik daıarlaý, qaıta daıarlaý jáne biliktilikti arttyrý kýrstaryna jiberildi. Sonymen qatar, 254 adam jastar praktıkasyna qabyldandy.
Bıyl Jumyspen qamtý ortalyǵyna bes jyl bolady. Osy kezeńde 36 bos oryndar jármeńkesi ótkizilip, 30 myńdaı elorda turǵynyna jumysqa ornalasýǵa kómek kórsetildi. Bes jylda 9,5 myń adam kásiptik daıarlaý jáne qaıta daıarlaýdan ótti.
