Astanada jyl basynan beri 6 824 páter paıdalanýǵa berildi
ASTANA. QazAqparat - Memlekettik saıasatty júzege asyrýdyń mańyzdy baǵyty halyqty baspanamen qamtý máselesi bolyp tabylady. Memleket basshysy Nursultan Nazarbaev «Nurly jol - Bolashaqqa bastar jol» atty halyqqa Joldaýynda turǵyn úı satyp alýdyń jańa sharttaryn ázirleý qajettiligin aıtty. Munymen qosa, turǵyn úı ınfraqurylymyn nyǵaıtý máselesi de ózekti bolyp otyr, dep jazady elorda ákimdiginiń resmı saıty.
Jyl saıyn baspanaly bolýǵa nıetti adamdar sany artyp keledi. Bıyl 2 096 qala turǵyny men 5 076 jas otbasy «Qoljetimdi baspana - 2020» baǵdarlamasyna qatysý úshin qujattaryn tapsyrdy.
Astana qalasynyń ekonomıka jáne bıýdjettik josparlaý basqarmasynyń habarlaýynsha, jyl basynan beri jalpy aýdany 903 599 sharshy metrlik 6 824 páter tapsyryldy. Sonyń ishinde 158 637 sharshy metr memlekettiń menshigi, bul ótken jylmen salystyrǵanda 4,4 esege artyq. Turǵyn úı qurylysyna kapıtal salymdaryn ıgerý 107 302,3 mln. teńgeni (2013 jylǵa qaraǵanda 134,4%) quraıdy.
Astanada memlekettik baǵdarlamalardy iske asyrý turǵyn úılerdi paıdalanýǵa berý jumystary jalǵasýda.
Eske salaıyq, Astana qalasy Qurylys basqarmasynyń habarlaýynsha, baǵdarlamany iske asyrý aıasynda elordada jalpy aýdany 130 myń sharshy metrdi quraıtyn 2 671 páterlik segiz turǵyn úı kesheniniń qurylysy júrgizilip jatyr. Sonyń ishinde 1 574 páterlik bes turǵyn úı keshenin jyl sońyna deıin tapsyrý kózdelgen.
Budan basqa, taǵy da 1 135 páterlik 8 turǵyn úı kesheni salynyp jatyr, paıdalanýǵa berý merzimi - 2015-2016 jj.
