Astanada jyl basynan beri 3 bala terezeden qulap qaıtys boldy
NUR-SULTAN. QazAqparat – Jyl bastalǵaly elordada balalardyń terezeden qulap ketýi boıynsha 24 fakti tirkeldi, dep habarlaıdy QazAqparat tilshisi qalalyq polıtsııa departamentiniń baspasóz qyzmetine silteme jasap.
«Polıtsııa departamenti jazataıym oqıǵalardyń aldyn alý úshin kámeletke tolmaǵan balalardyń qaýipsizdigine erekshe nazar aýdarýdy suraıdy. Elordada jyl basynan beri balalardyń terezeden qulap ketýiniń 24 faktisi tirkelip, 3 bala qaza tapty», - delingen resmı aqparatta.
Departamenttiń málimetinshe, qaraýsyz qalǵan balalar tereze aldyna ózdiginen shyǵyp qulap ketedi.
«Balalardyń terezeden qulap ketýi kóbinese eresekterdiń olardyń minez-qulqyn baqylamaýynan, terezeni jabýdy umytyp ketýdiń saldarynan týyndap jatady. Sonymen qatar adamdardyń atalǵan máselege salǵyrt qaraıtyndyǵy da sebep. Mysaly, terezelerde qorǵanysh quralynyń bolmaýy nemese jıhazdardyń durys ornalastyrylmaýy», - deıdi vedomstvodan.
Osy oraıda Nur-Sultan qalasynyń polıtsııa departamenti qaýip-qaterdiń aldyn alý maqsatynda kelesi erejelerdi saqtaý kerektigin eskertedi:
- páterdegi terezelerdi ashyp, úı-jaıdy jeldetý kezinde, balany qadaǵalap otyryńyz;
- balanyń balkonǵa eresekterdiń qaraýynsyz shyǵýyna jol bermeńiz;
- uıyqtap jatqan balany eshqashan páterde jalǵyz qaldyrmańyz, ol oıanyp, ashyq terezege shyǵyp qaraýy múmkin;
- barlyq jıhazdardy, sonyń ishinde tósekterdi terezelerden alystatyńyz, bul balanyń terezege kezdeısoq shyǵyp ketýine jol bermeıdi;
balaǵa terezeden nemese balkonnan kóshege qaraý úshin aıaǵynyń astyna oryndyq nemese basqa qurylǵyny qoıýdy úıretpeńiz, keıinirek osylaı áreket ete otyryp, ol tym eńkeıip terezeden qulap ketýi múmkin;
- moskıt torlary úlken qaýip tóndiredi: bala alda qandaı da bir tiregish baryn kóredi de oǵan senimdi túrde súıenedi, nátıjesinde ol tipti eń kishkentaı bir jasar balanyń salmaǵyna arnalmaǵan tormen birge qulap ketýi múmkin.
