Astanada jyl basynan 11 myń jup otbasyn qurǵan
ASTANA. QazAqparat - Astanada otbasy qurǵan juptar sany artyp keledi, dep habarlaıdy QazAqparat elorda ákimdiginiń resmı saıtyna silteme jasap.
Azamattyq hal-aktilerin tirkeý bóliminiń statıstıkasyna sáıkes, jyl basynan beri elordada 10 914 jup nekege turǵan.
Otbasyn qurýǵa sheshim qabyldaǵan jastardyń jasy joǵarylap keledi. Máselen, qalyńdyqtyń ortasha jasy 25 bolsa, er adamdar ortasha eseppen 35 jasynda úılenedi.
Nekege turǵan eń eresek jup - 55 jastaǵy áıel men 80 jastaǵy er adam.
Búgingi tańda jastar neke qııý sheshimin barynsha tarazylap baryp qabyldaıdy. Málim bolǵandaı, qazirgi kezde elordalyq er azamattar ózinen birneshe jas úlken qyzdardy jubaıy etip tańdaıdy.
«Buryn qalyńdyqtyń jasy kishirek bolsa, qazir kóbine kúıeý jigit jasyraq. Er azamattar ózinen bir-eki jasqa ǵana emes, 5-10 jasqa úlken boıjetkenderge úılenedi», - dep atap ótken bolatyn Saryarqa aýdany ákimdiginiń AHAT bólimi jetekshisi Bahytgúl Shaıkenova.
Sonymen qatar Astananyń jas turǵyndary arasynda sheteldik azamattarmen otaý tigý jaǵdaılary jıilegen.
«Kóbine boıjetkender sheteldik azamattarǵa turmysqa shyǵady. Bizdiń qyzdar Afrıka elderiniń azamattaryn jar etip tańdaıtyn jaǵdaılar az emes. Tańǵalatyny joq. Qazirgi kezde shekara ashyq emes pe?! Bizdiń eldiń azamattary shetelge jıi shyǵyp, jıi saıahattaıtyn boldy. Álemniń túkpir-túkpirinde Qazaqstan jaıly jaqsy biletin boldy», - deıdi ol.
Aıta keteıik, «Neke jáne otbasy» týraly QR zańyna sáıkes, er jáne áıel adamdar 18 jastan bastap nekege tura alady. Belgili sebepterge baılanysty ǵana jergilikti AHAT organdary neke jasyn 2 jasqa tómendete alady.
