Astanada júzýden Álem kýbogynyń kezeńi ótedi
ASTANA. KAZINFORM — 15-17 qazan aralyǵynda Astanada júzýden alǵash ret Álem kýbogynyń kezeńi ótedi. Elorda Silk Road Tour serııasynyń qorytyndy kezeńin qabyldaıdy.
2026 jyly World Aquatics Bakýdy (Ázerbaıjan), Tashkentti (Ózbekstan) jáne Astanany Álem kýbogynyń biryńǵaı baǵytyna biriktirdi. Serııa tarıhı Jibek jolynyń qurmetine Silk Road Tour dep ataldy. Birneshe ǵasyr boıy bul jol Eýropa men Shyǵys Azııany baılanystyrǵan.
Jarys Ázerbaıjan astanasynda bastalyp, júzgishter 1-3 qazan aralyǵynda synǵa túsedi. Odan keıin serııa 8-10 qazan kúnderi Tashkentte jalǵasyp, Astanada máresine jetedi.
Saıysqa ulttyq quramalardyń ókilderi, sondaı-aq belgilengen irikteý talaptaryn oryndaǵan klýb sportshylary qatysa alady. Qabyldaýshy elderdiń klýbtarynan kelgen júzgishter úshin bólek shekteý qarastyrylǵan: ár sportshy úsh dıstsıplınadan artyq jarysqa qatysa almaıdy.
Jarysqa álemniń úzdik júzgishteri, sonyń ishinde Olımpıada chempıondary men júldegerleri, álem chempıonattarynyń júldegerleri men álemdik rekord ıeleri qatysady. Jalpy, Silk Road Tour aıasyndaǵy úsh dodaǵa 50-den astam elden 750-den asa júzgish qatysady dep josparlanǵan.
Álem kýbogy jarystarynda kórsetilgen nátıjeler álem jáne jasóspirimder rekordy retinde resmı túrde esepke alynýy múmkin. Álem rekordy jańartylǵan nemese qaıtalanǵan jaǵdaıda, World Aquatics talaptaryna sáıkes nátıje resmı túrde tirkeledi.
Silk Road Tour qorytyndy reıtıngi Astanadaǵy jarys aıaqtalǵannan keıin jasalady. Sportshylardyń jalpy ornyn anyqtaý kezinde serııanyń barlyq kezeńinde kórsetken nátıjeleri esepke alynady. Bul rette ár kezeńde júzgishtiń eń úzdik úsh nátıjesi ǵana qorytyndy esepke engiziledi.
Kúzgi serııa jeltoqsan aıynda Qytaıdyń Beıjiń qalasynda ótetin qysqa basseındegi (25 metr) álem chempıonaty aldyndaǵy mańyzdy halyqaralyq jarystardyń biri bolmaq.
Aıta keteıik, Álem kýbogynyń kezeńi «Barys Arena» basseıninde ótedi.
Eske salaıyq, buǵan deıin Qazaqstan shańǵymen tuǵyrdan sekirýden FIS kýbogy kezeńinde eki altyn medal jeńip alǵanyn habarlaǵan edik.
