Astanada júzý sportynyń jańa kezeńi bastalýy múmkin

ASTANA. KAZINFORM — Astanada sý sporty túrlerin damytý máseleleri Olympic Aquatics chempıony Stefanı Raıspen ótken kezdesý barysynda talqylandy. 

2008 jylǵy Beıjiń Olımpıadasynyń úsh dúrkin chempıony, aýstralııalyq sportshy Stefanı Raıspen júzý sportynyń bolashaǵy, halyqaralyq yntymaqtastyq jáne jas sportshylardy qoldaý jaıynda pikir almasty.

Kezdesýge Qazaqstan Ulttyq Olımpıadalyq komıtetiniń bas hatshysy Álimjan Aqaev pen Kazakhstan Aquatics vıtse-prezıdenti Mırat Ótepov qatysty.

Dıalog barysynda elimizde júzý sportyn damytýǵa qatysty negizgi baǵyttar sóz boldy. Federatsııa ókilderi jańa basqarý komandasy týraly aqparat berip, Olımpıada chempıony Dmıtrıı Balandınniń júzý federatsııasynyń bas hatshysy bolyp saılanǵanyn atap ótti.

Kazakhstan Aquatics vıtse-prezıdenti Mırat Ótepovtiń aıtýynsha, qazirgi kezde federatsııa jas sportshylardy daıarlaýǵa erekshe nazar aýdaryp otyr. Sonymen qatar halyqaralyq keńesshi-jattyqtyrýshylardy tartý jáne World Aquatics aıasynda iri halyqaralyq týrnırler ótkizý josparlanýda.

Kezdesý aıasynda taraptar Astanadaǵy kópfýnktsııaly «Barys Arena» keshenin aralap, Qazaqstanda halyqaralyq deńgeıdegi sporttyq jarystar ótkizý múmkindikterin talqylady.

– Biz dıalog júrgizýge daıynbyz jáne álemdik sporttyń kóshbasshy ókilderimen tájirıbe almasýǵa qyzyǵýshylyq tanytamyz. Mundaı kezdesýler tek jekelegen sport túrlerin ǵana emes, jalpy olımpıadalyq qozǵalys aıasyndaǵy halyqaralyq qatynastardy nyǵaıtýǵa da úles qosatynyna senimdimiz, – dedi Álimjan Aqaev.

Aıta keteıik, mamyr aıynda Qazaqstan quramasy eskek esý sportynan Azııa chempıonatynda 12 medal aldy.