Astanada jýyrda paıdalanýǵa berilgen №6-shy turǵyn úı kesheniniń kommýnaldyq qyzmetter úshin qaryzy 7 mıllıon teńgeniń ústine shyqty

Bul týraly búgin qala ákimi Imanǵalı Tasmaǵambetovtyń tóraǵalyǵymen ótken keńeste málim boldy.

Qala basshysynyń orynbasary Vasılıı Krylovtyń aıtýynsha, memlekettik baǵdarlama boıynsha salynyp jatqan jańa úılerdi turǵyndarǵa tapsyrýdyń naqty tetikteriniń bolmaýy kóptegen problemalardy týyndatyp otyr. Oǵan búgingi kúni paıdalanýǵa berilgen №6-shy turǵyn úı kesheni mysal bola alady. Keshendegi 479 páterdiń kiltterin qazirgi kúni 203 turǵyn ǵana alǵan. Olardyń ishinde úıge naqty qonystanǵandary 89 bolsa, kelisimsharttarǵa otyrǵandary tek 50 ǵana. Aıta keteıik, atalmysh kóppáterli turǵyn úı kesheni 2005-2007 jyldarǵa arnalǵan Memlekettik turǵyn úı baǵdarlamasy aıasynda salyndy.

«Osylaısha, páterlerdiń jartysynan astamynda kommýnaldyq qyzmetter (ásirese jylý) tólenbeı otyr. Nátıjesinde jınalǵan 7 mıllıon teńge kólemindegi debıtorlyq qaryz «Turmys» JShS-ǵa beriledi. Atalmysh JShS turǵyn úıdi qoldanysqa berýmen aınalysady. Al onyń bıýdjetinde kelisimshartsyz qoldanylǵan qyzmetterdiń shyǵyndaryn óteýge qarajattar qarastyrylmaǵan. Nátıjesinde «óli» debıtorlyq qaryzdar qalyptasýda», - dep atap ótti ol.

Osyǵan oraı V.Krylov, «Astanada jańadan turǵyzylyp jatqan úıler, olarǵa paıdalanylǵan elektr jaryǵynyń kórsetkishterin qashyqtyqtan kórýge múmkindik beretin zamanaýı qurylǵylar ornatylǵannan keıin ǵana paıdalanýǵa berilse», degen usynysyn bildirdi.