Astanada jutqynshaq isigin emdeýdiń jańa ádisimen 4 ota jasaldy
ASTANA. 5 qarasha. QazAqparat - Elordada №1 qalalyq aýrýhananyń Otorınolarıngologııa ortalyǵynda jastyq muryn-jutqynshaq angıofıbromasyn hırýrgııalyq emdeýdiń jańa ádisimen 4 ota jasaldy. Bul týraly Densaýlyq saqtaý basqarmasyna silteme jasap astana.kz habarlady.
«Jarty jyl boıy dárigerler oılap tapqan emdeý ádisiniń tıimdiligin túpkilikti baǵalaý úshin operatsııadan keıingi kezeńde patsıentterdiń jaǵdaıyn baqylaǵan. Dárigerlerdiń jaǵymdy úmitteri rastaldy, barlyq patsıentter ózin jaqsy sezinedi»,- deıdi dárigerler.
Ústimizdegi jyldyń naýryz aıynda №1 qalalyq aýrýhananyń Otorınolarıngologııa ortalyǵynyń jetekshi mamandary ınterventsııalyq rentgenhırýrgtarmen birlesip jastyq muryn-jutqynshaq angıofıbromasyn hırýrgııalyq emdeýdiń jańa ádisin jasap, engizgen.
Jastyq muryn-jutqynshaq angıofıbromasy jasóspirimderde eń jıi kezdesetin muryn-jutqynshaq isikteriniń birine jatady. Aıta keteıik, bas pen moıynnyń barlyq isikteriniń kezdesý jıiligi 50-60 myń LOR patsıenterge 1 nemese 0,5% quraıdy. Aýrýdyń belgileri isikterdiń ulǵaıýy men shektes qurylymdardyń zaqymdanýyna qaraı artady. Patologııany anyqtaý men emdeý qıyn, al osy túrdiń isikterin sylyp tastaý boıynsha operatsııalar otorınolarıngologııadaǵy eń kúrdeli otalar bolyp sanalady.
