Astanada jýrnalısterge LRT vagondary tanystyryldy
ASTANA. KAZINFORM – Astanada jýrnalısterge LRT vagondary tanystyryldy. Qytaıda qurastyrylǵan vagondar elordanyń klımattyq erekshelikterine beıimdelip jasalǵan. Olar bıyl qysta aýa temperatýrasy -30 gradýsqa deıin tómendegen kezde synaqtan ótkizilgen.
«City Transportation Systems» JShS basqarma tóraǵasy Asylbek Dúısebaevtyń aıtýynsha, vagondardy ázirleý kezinde shý deńgeıin tómendetýge erekshe nazar aýdarylǵan.
– Qazaqstan tarapynyń talaby boıynsha shýdy barynsha azaıtý úshin vagon qabyrǵalary qalyńdaý etip jasaldy. Sonyń arqasynda poıyzdyń ishi de, syrty da óte tynysh. Bul úshin arnaıy rezeńke materıaldar paıdalanyldy, – dedi ol Biryńǵaı dıspetcherlik ortalyqty aralaý kezinde.
Onyń málimetinshe, bir quramnyń uzyndyǵy 60 metr. Bıiktigi – 3,8 metr, al eni – 2,8 metr. Ár quram tórt vagonnan turady jáne 600-den astam jolaýshyny tasymaldaýǵa múmkindik beredi.
Sondaı-aq, LRT-nyń ortasha jyldamdyǵy saǵatyna 50-60 shaqyrym bolady dep josparlanyp otyr.
- Poıyzdar aralyǵy shamamen 5-6 mınýt. Al uzyndyǵy 22 shaqyrym bolatyn baǵytty jolaýshylar 40 mınýt shamasynda júrip óte alady, – dedi kompanııa basshysy.
Buǵan deıin Astana ákimi Jeńis Qasymbek LRT jelisindegi synaq jumystary is júzinde aıaqtalyp, júıe tolyqtaı paıdalanýǵa daıyn ekenin málimdegen edi.
