Astanada jýrnalıster úshin til mádenıetin jetildirýge arnalǵan semınar ótedi

ASTANA. QazAqparat - Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń tapsyrmasymen «Sh. Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy» RMKQ ústimizdegi jylǵy 28 qazanda «Buqaralyq aqparat quraldary jáne til mádenıeti» taqyrybynda respýblıkalyq semınar-trenıng ótkizedi.

Bul týraly Tilderdi damytý jáne qoǵamdyq-saıası jumys komıtetinen habarlady.

Kez kelgen eldiń saıası-ekonomıkalyq, áleýmettik-mádenı damýyn nasıhattaýdaǵy buqaralyq aqparat quraldarynyń erekshe oryn alatyny belgili. Qazaq tiliniń memlekettik til mártebesine saı qyzmet etýi men ony damytýda da BAQ róli aıryqsha.

Semınar-trenıng halyqtyń jyry men syryn únemi jaryqqa shyǵaryp, úzdiksiz baılanys ornatatyn BAQ ókilderi, onyń ishinde telearna, radıotilshilerimen kezdesý uıymdastyryp, olardyń sózdik qoryn, sóz saptaýyn, til mádenıetin jetildirýge arnalady.

Semınar-trenıngte kásibı mamandar dáris oqyp, buqaralyq aqparat quraldarynda memlekettik tilde aqparat taratý, sonyń ishinde til normasynyń saqtalýy, sóıleý mádenıeti, termınderdiń birizdi qoldanylýy máseleleri boıynsha sheberlik sabaqtaryn kórsetedi.

Sharaǵa til bilimi jáne jýrnalıstıka salasynyń ǵalymdary, buqaralyq aqparat quraldaryndaǵy til salasyna jaýapty qurylymdardyń basshylary men mamandary, telearna, radıotilshileri qatysady.

Semınar-trenıngke qatysqan tilshilerge sertıfıkat tabystalady.