Astanada jýrnalıster fýtboldan synǵa tústi
ASTANA. QazAqparat - Astanadaǵy Əlkeı Marǵulan atyndaǵy № 40 qazaq orta mektebinde shaǵyn fýtboldan BAQ ókilderi arasynda Qazaqstan sport baspasózi qaýymdastyǵy qalalyq fılıalynyń kýbogy úshin týrnır ótti, dep habarlaıdy QazAqparat.
Bul jarysqa buqaralyq aqparat quraldarynyń 8 komandasy qatysty. Onda Qazaqstan sport baspasózi qaýymdastyǵy Astana qalalyq fılıalynyń «Jeńis», «Egemen Qazaqstan» gazeti, «Habar» agenttigi, «Qazaq Radıosy», «QazMedıa», «Sport 59», Kazsport pen «Atameken» bıznes telearnasynyń klýbtary kúsh synasty.
Týrnırdi alǵy sózben Mádenıet jəne sport mınıstrligi Sport jəne deneshynyqtyrý isteri komıtetiniń tóraǵasy Elsııar Qanaǵatov ashty.
Komandalar eki topqa bólinip, óner kórsetti. «A» tobynda Qazaq Radıosy, «Egemen Qazaqstan», Kazsport pen «Habar» ujymynyń komandalary oınasa, «V» tobynda alańǵa «QazMedıa», «Jeńis», «Sport 59» ben «Atameken» telearnasynyń jigitteri shyqty.
«A» tobynda «Habar» agenttigi men «Egemen Qazaqstan» gazetiniń klýbtary birinshi jáne ekinshi orynmen kelesi aınalymǵa shyqsa, «V» tobynda «Jeńis» pen «Sport 59» komandalary ½ fınalǵa joldama aldy. Sóıtip, jartylaı fınaldyń birinshi matchynda «Habar» men «Sport 59» klýbtary kezdesti. Bul oıynda jýrnalıster dodasynda top jaryp, bas júldeni ıemdenip júrgen «Habardyń» jigitteri basymdyq tanytty. Komanda kapıtany Nursultan Qurman bastaǵan jigitter týrnırdiń «tıneıdjerler» komandasy atanǵan «Sport 59» klýbyn 3:0 esebimen utty.
Jartylaı fınaldyń ekinshi oıyny «Jeńis» pen «Egemen Qazaqstan» komandalarynyń arasynda ótti. Buǵan deıin Astana qalalyq fýtbol federatsııasynyń uıymdastyrýymen ótken BAQ lıgasynda Qazaqstan sport baspasózi qaýymdastyǵy qalalyq fılıalynyń klýby «Egemenniń» oıynshylarynan jeńilgenin bilemiz. Kezdesýde «Jeńistiń» jigitteri sol joly ketken eseni qaıtaryp aldy. Olar qarsylastaryn 3:2 esebimen jeńdi. Al týrnırdiń úshinshi orny úshin bolǵan matchta «Sport 59» «tıneıdjerler» komandasy «Egemenniń» jasaǵynan aılasyn asyryp, qola júldeger atandy.
Bul synda «Jeńis» klýbynyń baby men baǵy kelisti. Qazaqstan sport baspasózi qaýymdastyǵy qalalyq fılıalynyń klýby fınalda «Habar» agenttiginiń jigitterin penaltı serııasynda utyp, týrnırdiń jeńimpazy ataǵyn jeńip aldy. Matchta komandalar bir-birine des bermeı, jankúıerlerge tamasha oıyn syılady. Máselen, 3:3 esebimen aıaqtalǵan oıynda «habarlyqtar» 1:3 esebimen jeńilip jatyp, esepti teńestirip ketti.
