Astanada jýrnalıster arasynda shaǵyn fýtboldan týrnır ótti (FOTO)
ASTANA. QazAqparat - Senbi kúni Q. Muńaıtpasov atyndaǵy ortalyq stadıonda shaǵyn fýtboldan týrnır ótti. Baılanys jáne aqparat kúnine oraı uıymdastyrylǵan sharaǵa belgili telearnalardyń, baspasózdiń, aqparat agenttikteriniń ókilderi qatysty. Bas júldeni «Qazaq radıosynyń» komandasy enshiledi, dep habarlady qala ákiminiń resmı saıty.
Stadıonda oıynshylar men olarǵa qoldaý kórsetýge kelgen jankúıer áriptesteriniń kóńil-kúıi erekshe sezildi.
Shara barysynda «Kazsport», «Habar», «Qazaqstan» telearnalarynyń, «Astana Aqshamy», «Egemen Qazaqstan» gazetteriniń, sondaı-aq, «Kazkontent», «Jýrnalıstter úıiniń», «QazAqparat» agenttiginiń, «Qazmedıa ortalyǵynyń», «Kórkem» stýdııasynyń, Astana qalasy Іshki saıasat basqarmasynyń, «Qazaq radıosy» jáne «National Geographic Qazaqstan» qyzmetkerleri sheberlik baıqasty.
- Qurmetti áriptester, Sizderdi aldaǵy Baılanys jáne aqparat kúnimen quttyqtaımyn. Sizderdiń belsendi azamattyq ustanymdaryńyz - obektıvtilikterińiz ben jańalyqqa, aqıqatty anyqtaýǵa degen umtylystaryńyz - kásipterińizdiń erekshe qasıeti osy. Biz BAQ ókilderimen dostyq áriptestik qarym-qatynasymyzdy joǵary baǵalaımyz. Barshańyzǵa tabys pen jańa shyńdardan kórinýdi tileımin, árqashan da kózdegen maqsattaryńyzǵa jetińizder, - dedi qalalyq Іshki saıasat basqarmasynyń basshysy Erlan Kanalımov.
Jerebe tastalǵannan keıin komandalar tórt shaǵyn topqa bólindi.
Stadıon alańy ekige bólinip, bir ýaqytta eki komandadan jarysty. Bir taım 10 mınýtqa sozyldy.
Tartysty ótken týrnırde «Qazaq radıosynyń» jýrnalıstteri bas júldeni jeńip aldy.
- Búgin mereke qarsańynda barlyq jýrnalıstter óz jumysynyń qorytyndysyn shyǵardy. Jarysqa 13 komanda qatysty, sonyń ishinde Amangeldi Seıtqan, Zeıin Álipbek syndy jýrnalıstıka maıtalmandary da oınady. Osyndaı is-sharalardyń arqasynda biz - jas jýrnalıster úlgi alyp, kásibı turǵydan ósemiz. Bárine de sáttilik tileımin, kelesi merekede kezdeskenshe, - dedi «Qazaq radıosynyń» dıktory Dosymjan Ermurat.
Jarysta «kúmis» júlde «Habar» telearnasynyń qyzmetkerlerine, «qola» «Qazaqstan» telearnasyna buıyrdy. «QazAqparat» halyqaralyq aqparat agenttigi tórtinshi orynda.
Júldeli oryn alǵan komandalar baǵaly syılyqtarmen marapattaldy. 
