Astanada jýrnalıster arasynda «ELORDA CUP-2018» týrnıri ótip jatyr
ASTANA. QazAqparat - Astana qalasynyń ákimdigine qarasty «Elorda Aqparat» medıa-kompanııasynyń bastamasymen «Astana Arena» stadıonynda «ELORDA CUP-2018» shaǵyn fýtboldan qaıyrymdylyq jarysy ótip jatyr.
Týrnırdiń ótýine elimizdiń ekonomıkasyna úles qosyp kele jatqan «ShELL» kompanııasy men «ELORDA AQPARAT» medıakompanııasy, elorda ákimdigi muryndyq bolǵan, dep habarlaıdy QazAqparat tilshisi.
Áýesqoı sportshylar arasynda ótip jatqan týrnır aldymen salaýatty ómir saltyn nasıhattasa, ekinshiden munaı-gaz salasy men jýrnalıster qaýymy arasynda yntymaqqa dáneker bolyp otyr. Uıymdastyrýshylardyń aıtýynsha, bul týrnır Astanada dástúrli túrde ótip turady.
«Búgin Sizder men bizder Otanymyzdyń júregine, Táýelsizdigimizdiń tiregine aınalǵan Astanamyzdyń 20-jyldyq mereıtoıyna arnalǵan jáne «ShELL» kompanııasynyń Qazaqstanda jumys júrgize bastaǵanyna 25 jyl tolýyna oraı uıymdastyrylǵan sharanyń birine qatysyp otyrmyz», - dedi týrnırdiń ashylýynda Astana qalasy əkiminiń orynbasary Ermek Amanshaev.
Jarysqa 16 komanda qatysýda. Onyń ishinde Astana qalasy ákimdigi, QR Energetıka mınıstrligi, «Shell Qazaqstan», «Qazaqmunaıgaz UQ» AQ, «ENI», «Total», «NKOK N.V.», «KPO B.V.», «PSA» JShS, «Qazaqstan», «Habar», «Egemen Qazaqstan», «Astana TV», «QAZAQ RADIOSY», «Qazaqparat» jáne «ELORDA AQPARAT» komandalary bar.
Munaı-gaz salasynyń ókilderi jarysqa qatysý úshin jarna qosyp otyr. Munaı-gaz kompanııalarynan jınalǵan qarajat 2019 jyly naýryzda BAÁ-de ótetin Dúnıejúzilik Jazǵy Olımpıada oıyndaryna múmkindigi shekteýli jasóspirimderden quralǵan shaǵyn fýtboldan Qazaqstannyń jastar quramasynyń daıyndyǵy úshin «Speshıal Olımpıks Qazaqstan» uıymyna aýdarylady.
