Astanada Jýrnalıster alleıasyndaǵy músindi búldirgen jastar ustaldy
ASTANA. KAZINFORM — 26 qyrkúıek kúni tańerteń Astanadaǵy Jýrnalıster alleıasynda vandalızm deregi tirkeldi. Tártip saqshylary eki jas jigitti anyqtap, ustady.
Astana polıtsııa departamentiniń málimetinshe, eki jas jigit músindik kompozıtsııany, sondaı-aq oǵan irgeles aýmaqta ornalasqan jeti qoqys jáshigin búldirgen.
Polıtsııa elordanyń eki turǵynyn — 18 jastaǵy Denıs Sýranov pen bir kámeletke tolmaǵan jasóspirimdi anyqtap, ustady. Ekeýi de ýaqytsha ustaý ızolıatoryna qamaldy.
Vandalızm faktisi boıynsha qylmystyq is qozǵaldy.
— Kámeletke tolmaǵan jasóspirimniń ata-anasy ony tárbıeleý jónindegi mindetterin tıisinshe oryndamaǵany úshin ákimshilik jaýapkershilikke tartyldy, — delingen habarlamada.
Polıtsııa ókilderi mundaı áreketterge qatań tosqaýyl qoıylatynyn atap ótti. Mundaı birde-bir derek quqyqtyq baǵalaýsyz qalmaıdy, al kináliler zańǵa sáıkes qatań jaýapkershilikke tartylady.
Eske salaıyq, jyl basynan beri Astanada 94 adam vandalızm úshin jaýapkershilikke tartylǵanyn habarlaǵanbyz.
