Astanada jýrnalıst kelinshekti óltirgen kóńildesine izdeý jarııalandy
ASTANA. QazAqparat - Elordada jýrnalıst kelinshekti óltirgen kóńildesine izdeý jarııalandy. Bul týraly QR ІІM resmı ókili Almas Sadýbaev málim etti, dep habarlaıdy QazAqparat tilshisi.
«Keshe túnde qaıǵyly oqıǵa oryn aldy. Jýrnalıst I.Beketovany ashynasy A.Gýseınov ony úıdiń kire berisinde ózge er adammen turǵanyn kórip, qyzǵanyshtan óltirgen. Qaza tapqan azamatsha men kóńildes arasynda urys-keris oryn alǵan. Urys-keristi kórgen qaza tapqan azamatshanyń tanysy ketip qalmaq bolǵan. Alaıda ol ketip bara jatyp, onyń áıeldi uryp jatqanyn estigen. Qaıta aınalyp joǵary kóterilgende es-tússiz jatqan áıeldi kórip, jedel járdem shaqyrǵan. Bul ýaqytta Gýseınov belgisiz baǵytqa boı tasalaǵan», - dedi resmı ókil.
Onyń dereginshe, Beketova men Gýseınov resmı nekege otyrmaǵan. Olardyń eki balasy bar.
«Qylmyskerdi ustaýǵa elordalyq ІІD-niń barlyq jeke quramy men kúshteri jumyldyryldy. Atalǵan qylmysty jasaǵany úshin 1984 jyldyń 23 shilde aıynda Astana qalasynda dúnıege kelgen Gýseınov Anatolıı Mıhaılovıch izdestirilýde. Kez kelgen aqparatty biletin azamattarǵa myna telefondar boıynsha Astana qalalyq ІІD-ine habarlasýyn suraımyz: 8 (7172) 71-60-17, 71-61-47, 71-60-21 nemese keshekshilik bólim 71-60-10, 71-60-11», - dedi Almas Sadýbaev.
