Astanada júrgizýshisiz taksı jobasyn iske qosý týraly memorandýmǵa qol qoıyldy
ASTANA. KAZINFORM — Memorandým ózdiginen júretin taksı jobasyn 2026 jyldan bastap kezeń-kezeńmen (normatıvtik jáne tehnologııalyq pysyqtaýdan bastap pılottyq iske qosýǵa deıin) iske asyrýdy kózdeıdi, dep habarlaıdy Jasandy ıntellekt jáne tsıfrlyq damý mınıstrligi.
Astanada QR Jasandy ıntellekt jáne tsıfrlyq damý mınıstrligi, Kólik mınıstrligi, Astana qalasynyń ákimdigi jáne Yandex Qazaqstan kompanııasynyń qatysýymen júrgizýshisiz taksıdi damytý jónindegi yntymaqtastyq týraly memorandýmǵa qol qoıyldy. Taraptar elordada avtonomdy taksı qyzmetin iske qosý týraly kelisimge keldi.
Memorandýmǵa qol qoıý rásimine QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev, Kólik mınıstri Nurlan Saýranbaev, Astana qalasy ákiminiń orynbasary Evgenıı Glotov jáne Yandex Qazaqstan basshysy Tımýr Shálekenov qatysty.
Júrgizishisiz taksı qalalyq mobıldilikti uzaq merzimdi damytýdyń bir bóligi retinde qarastyrylady. Halyqaralyq zertteýler derekterine súıensek, avtonomdy tehnologııalar adam faktoryn azaıtý arqyly jol-kólik oqıǵalarynyń sanyn tómendetýge, kólik aǵynyn ońtaılandyrýǵa jáne halyqtyń ártúrli toptary, sonyń ishinde qozǵalysy shekteýli azamattar úshin qoljetimdikti arttyrýǵa múmkindik beredi. Sonymen qatar, iri qalalardyń ornyqty kólik júıesiniń mańyzdy elementine aınalady.
— Biz úshin qaýipsizdik, jaýapkershilik, adam men algorıtmderdiń ózara árekettesýi máselelerin aldyn ala pysyqtaý, sondaı-aq mundaı sheshimderdiń zańdy ári ashyq túrde damýyna múmkindik beretin normatıvtik bazany daıyndaý mańyzdy. Avtonomdy taksı — tehnologııalar adam ıgiligine qyzmet etetin «aqyldy qala» ekojúıesiniń bir bóligi, — dep atap ótti QR Jasandy ıntellekt jáne tsıfrlyq damý mınıstrligi Tsıfrlyq aktıvter jáne serpindi tehnologııalar komıtetiniń tóraǵasy Ǵızzat Baıtursynov.
Yandex Qazaqstan basshysy Tımýr Shálekenov Yandex Qazaqstan-nyń avtonomdy kólik jobasy kezeń-kezeńmen iske qosylatynyn aıtty — aldymen pılottyq rejımde jáne testileýden bastalady.
— Mundaı format qalalyq ortanyń naqty jaǵdaılaryn eskerýge múmkindik beredi. Servıste dıspetcherlik qyzmetpen táýlik boıǵy baılanys jáne saparlardy saqtandyrý qarastyrylǵan. Júrgizýshisiz kólikti basqarý júıesi jasandy ıntellektini, jol jaǵdaıyn úzdiksiz baqylaýdy jáne qaýipsiz áreket etý stsenarıılerin qamtıtyn avtonomdy júrgizýdiń synaqtan ótken tásilderine negizdeledi. Tájirıbe jınaqtalyp, jumystyń turaqtylyǵy rastalǵan saıyn qyzmet aýqymy keńeıedi, — dedi Tımýr Shálekenov.
Memorandýmǵa qol qoıý memleket, qala jáne tehnologııalyq kompanııanyń ınnovatsııalyq kólik sheshimderin damytýǵa degen ortaq qyzyǵýshylyǵyn kórsetedi. Qazir taraptar normatıvtik bazany qalyptastyrýǵa, ınfraqurylymdyq talaptardy baǵalaýǵa jáne ózdiginen júretin kólikti qalalyq ortaǵa ıntegratsııalaý stsenarıılerin taldaýǵa basymdyq berip otyr.
Budan buryn Jasandy ıntellekt jáne tsıfrlyq damý vıtse-mınıstri Dmıtrıı Mýn kelesi jyly elordanyń jańa ýchaskelerinde júrgizýshisiz avtomobıldi pılottyq rejımde iske qosý josparlanyp otyrǵanyn aıtty.