Astanada júrgizýshimen janjaldasyp, avtobýs áınegin syndyrǵan jolaýshy jazalandy
ASTANA. KAZINFORM — Júrgizýshimen janjaldan keıin avtobýstyń áınegin syndyrǵan jolaýshy sot sheshimimen 20 táýlikke ákimshilik qamaýǵa alynyp, keltirilgen materıaldyq shyǵyndy óteýge mindetteldi.
Polıtsııaǵa qalalyq avtobýstardyń birinde jolaýshy janjal shyǵaryp, júrgizýshi kabınasyn salonnan bólip turǵan áınekti syndyrǵany týraly habarlama túsken.
— Tekserý barysynda 44 jastaǵy er adamnyń jeke basy anyqtaldy. Belgili bolǵandaı, janjaldyń shyǵýyna avtobýs onyń túsýge tıis aıaldamaǵa toqtamaı, ótip ketkeni sebep bolǵan. Osydan keıin jolaýshy júrgizýshimen sózge kelip, ashýǵa býlyǵyp, júrgizýshi kabınasy men salondy bólip turǵan áınekti judyryǵymen uryp syndyrǵan, — dep habarlady qalalyq polıtsııa departamentiniń baspasóz qyzmeti.
Usaq buzaqylyq jasaǵany úshin er adam ákimshilik jaýapkershilikke tartyldy. Sot sheshimimen oǵan 20 táýlikke ákimshilik qamaýǵa alý jazasy taǵaıyndaldy. Sonymen qatar ol keltirilgen materıaldyq shyǵyndy óteýge mindetteldi.
Polıtsııa kez kelgen daýly jaǵdaı zań aıasynda sheshilýge tıis ekenin, agressıvti áreket, múlikti búldirý jáne qoǵamdyq tártipti buzý zańnamada kózdelgen jaýapkershilikke ákep soǵatynyn eskertti.
Eske salaıyq, buǵan deıin Astanada qoǵamdyq orynda balaǵat sóz aıtqan sportshy jazalanǵanyn habarlaǵan edik.
