Astanada júrgizýshi kýáligin jasap berýdi ýáde etken alaıaq 3 jyl 6 aıǵa sottaldy
ASTANA. KAZINFORM - Júrgizýshi kýáligin tanystary arqyly jasap berýge ýáde etken alaıaqqa 6 qala turǵyny óz qarajattaryn senip tapsyrǵan. Alaıda ol óz mindettemelerin oryndamaı, alǵan aqshany jeke qajettilikterine jumsaǵan, dep habarlaıdy Astana qalalyq prokýratýrasynyń baspasóz qyzmeti.
Baspasóz qyzmetiniń málimetterine qaraǵanda, keltirilgen shyǵynnyń jalpy somasy 2,3 mln teńgeni qurady.
Sotta prokýror sottalýshynyń kinásin tolyq dáleldedi.
Sottalýshynyń kinásin moıyndaýy jáne keltirilgen shyǵyndy ishinara óteýi eskerilip, sot úkimimen oǵan 3 jyl 6 aı merzimge bas bostandyǵyn shekteý jazasy taǵaıyndalyp, probatsııalyq baqylaý belgilendi. Sondaı-aq jazany óteý merzimi ishinde jyl saıyn 100 saǵat kóleminde májbúrli eńbekke tartý belgilendi.
-Sottalǵan adamǵa birqatar mindetter júkteldi. Atap aıtqanda, probatsııa qyzmetin habardar etpeı turǵylyqty jáne jumys ornyn ózgertýge, alkogoldik ishimdikterdi tutynýmen baılanysty oıyn-saýyq oryndaryna barýǵa tyıym salyndy. Jumysy bolmaǵan jaǵdaıda jumyssyz retinde tirkelý, sondaı-aq sot belgilegen túngi ýaqytta (saǵat 22:00-den 06:00-ge deıin) turǵylyqty jerinen tys jerde bolýǵa shekteý qoıyldy,-delingen habarlamada.
Sot úkimi zańdy kúshine endi.
Astana qalasynyń prokýratýrasy azamattardy qyraǵylyq tanytýǵa, zańda belgilengen tártipti aınalyp ótip, qandaı da bir máseleni sheshýge ýáde bergen adamdarǵa aqsha qarajatyn bermeýge jáne memlekettik qyzmetterdi alýdyń tek zańdy tásilderin paıdalanýǵa shaqyrady.
Osyǵan deıin 2026 jyly elimizde qansha adam júrgizýshi kýáliginen aıyrylǵany jáne oǵan ne sebep bolǵany týraly jazdyq.
