Astanada júrgizýshi-qyzǵa shabýyl jasap, kóligin aıdap áketken jigit ustaldy
ASTANA. QazAqparat - Elordalyq polıtseıler júrgizýshi-qyzǵa shabýyl jasaǵan tonaýshyny qolǵa túsirdi.
Astana q. ІІD baspasóz qyzmetinen habarlaǵandaı, polıtsııa qyzmetkerleri bir táýlik ishinde 24 jastaǵy elorda turǵynyn anyqtap, ustady.
19 qarashada shamamen saǵat 18.00-de kúdikti «Alash» tas jolynda «Lada Granta» markili kólikti toqtatady. Ony 25 jastaǵy qyz basqaryp kele jatqan. Onyń qasynda qurbysy otyrǵan. Er adam qyzdardan Qoıandy kentine deıin jetkizip salýdy suraǵan. Jolda qysqa joldy bilemin dep qyzdardy aldap, jer jolǵa túsirgen. Keıin er adam júrgizýshi qyz ben onyń qurbysynan uıaly telefondary men zergerlik buıymdaryn tartyp alyp, kólikke otyryp, qalaǵa qaraı tartyp otyrǵan.
Atalǵan fakt sot aldyndaǵy tergeýdiń biryńǵaı reestrine QR QK 191 jáne 200-baptary boıynsha tirkeldi. Ustalǵan azamat osyǵan uqsas birneshe qylmys jasaǵany belgili boldy.
