Astanada júrgizýshi kýáliginen aıyrylǵan azamat boıjetkendi qaǵyp ketti
ASTANA. QazAqparat - Astanada mas júrgizýshi qarsy jolaqqa shyǵyp ketip, avtobýs aıaldamasyna soǵylyp, 16 jastaǵy boıjetkendi qaǵyp ketti, dep habarlady «QazAqparat» HAA elordanyń ІІD-niń baspasóz qyzmetine silteme jasap.
«19 shildede saǵat 10.58-de Esenberlın kóshesinde «Mitsubishi Sigma» markaly kólikti basqarǵan júrgizýshi kólikti basqara almaı qarsy jolaqqa shyǵyp, avtobýs aıaldamasynda turǵan kámelettik jasqa tolmaǵan boıjetkendi qaǵyp ketti», - delingen habarlamada.
Apat saldarynan jaraqat alǵan boıjetken aýrýhanaǵa jetkizildi. Al ony qaqqan 21 jastaǵy er adamdy, 2016 jyldyń mamyrynda Astana ákimshilik soty ÁQtK 608-babyna sáıkes úsh jylǵa júrgizýshilik kýáliginen aıyrǵan. Odan ishimdiktiń ıisi shyqqan soń, júrgizýshi medıtsınalyq-áleýmettik saýyqtyrý ortalyǵyna jetkizildi, ol medıtsınalyq kýálandyrýdan bas tartty.
Oǵan qatysty ÁQtK 613-baby boıynsha ákimshilik hattama toltyrylyp, is ákimshilik sotqa jiberildi. Astana aýdanaralyq mamandandyrylǵan sotynyń sýdıasy oǵan 20 táýlikke tutqyndaý túrinde jaza taǵaıyndady. Budan basqa, saraptamalar taǵaıyndaldy.
