Astanada júrgizýshi kýáliginen aırylǵan 169 adam rýlge qaıta otyrǵan
NUR-SULTAN. QazAqparat –Astanada 4 aıda kólik júrgizý quqyǵynan aırylǵan 169 júrgizýshi ustaldy. Kólik júrgizý quqyǵynan aırylǵan júrgizýshilerdi anyqtaý úshin «Qorǵaý» mobıldi qosymshasy paıdalanylady, dep habarlaıdy QazAqparat Nur-Sultan qalalyq polıtsııa departamentiniń baspasóz qyzmetine silteme jasap.
Elordada ІІM jol qozǵalysyn baqylaýdyń avtomattandyrylǵan «Qorǵaý» júıesi 26 sáýirden bastap iske qosyldy. Sodan beri jol qozǵalysy erejelerin buzýshylar týraly málimet qyzmetkerlerdiń planshetterine tikeleı túsedi, bul – zań buzýshylyqty jyldam anyqtaýǵa múmkindik beredi.
«Máselen, reıd barysynda mobıldi qosymshaǵa kólik júrgizý quqyǵynan aırylǵan júrgizýshilerge qatysty habarlamalar tústi. Bir kúnde 3 júrgizýshi ustaldy, olarǵa qatysty QR ÁQBtK-niń 612-baby 3-bóligi (Kólik quralyn júrgizý quqyǵynan aıyrylǵan júrgizýshiniń kólik quralyn júrgizýi) boıynsha ákimshilik hattama toltyryldy. Júrgizýshilerge 50 AEK kóleminde aıyppul salynady nemese 10 táýlikke ákimshilik qamaýǵa alynady. Barlyǵynyń buryn sot sheshimimen 7 jylǵa kólik júrgizý quqyǵynan aıyrylǵany anyqtaldy. Avtokólikter kommýnaldyq turaqqa ornalastyryldy», - delingen baspasóz málimdemesinde.
ІІM «Qorǵaý» mobıldi qosymshasy iske qosylǵaly beri 4 925 júrgizýshige ákimshilik quqyq buzýshylyq boıynsha bereshegi týraly habarlama jiberilgen. Nur-Sultan qalasynyń kommýnaldyq turaǵyna 673 avtokólik ornalastyryldy. Sonymen qatar, kólikti jalǵan nómirmen basqarǵan 84 júrgizýshi, qujatsyz 395 júrgizýshi jáne kólikti basqarý quqyǵynan aıyrylǵan 169 júrgizýshi ustaldy.
