Astanada júrgizýshi kýáligin satyp kelgen toptyń ishinde HQO qyzmetkerleri bar ma

NUR-SULTAN. QazAqparat - «Azamattarǵa arnalǵan úkimet» memlekettik korporatsııasy Nur-Sultandaǵy júrgizýshi kýáligin satý oqıǵasyna qatysty pikir bildirdi, dep habarlaıdy QazAqparat.

«Búgin birqatar buqaralyq aqparat quralynda sybaılas jemqorlyqqa qarsy qyzmettiń Nur-Sultanda jalǵan medıtsınalyq anyqtamalar men avtomektepterdi bitirgendigi týraly jalǵan qujattardy jasap, azamattarǵa is júzinde bilim bermeı, teorııalyq jáne praktıkalyq emtıhansyz júrgizýshi kýálikin zańsyz satqan bir top adamǵa qatysty qylmystyq isti qozǵaǵany týraly aqparat jarııalandy. Osyǵan baılanysty «Azamattarǵa arnalǵan úkimet» memlekettik korporatsııasy tamyz aıynyń basynda sybaılas jemqorlyqqa qarsy qyzmettiń Nur-Sultandaǵy mamandandyrylǵan HQO aýmaǵynda jedel-izdestirý is-sharalaryn ótkizgendigi, onyń barysynda bir top adamnyń ustalǵanyn jáne olardyń arasynda avtoHQO qyzmetkerleriniń joqtyǵyn habarlaıdy» delingen habarlamada.

Korporatsııanyń málimetinshe, qosymsha tergeý nátıjesinde «Azamattarǵa arnalǵan úkimettiń» Nur-Sultan qalasyndaǵy fılıal qyzmetkerleriniń tergeýge alynǵan faktilerge qatysy bary anyqtalmaǵan.

Atalǵan qylmystyq iske qatysty adamdardyń jeke basy jáne jumys orny týraly tolyq aqparat alý úshin Sybaılas jemqorlyqqa qarsy qyzmetke júginý qajet.

Azamattarǵa arnalǵan Úkimet sybaılas jemqorlyqqa tózbeýshilik pen óz qatarlarynyń tazalyǵy qaǵıdattaryn ustanatyndyǵyn eskertemiz, sondyqtan óz betinshe, sondaı-aq ýákiletti jáne quqyq qorǵaý organdarymen birlesip, sybaılas jemqorlyq táýekelderin anyqtaý jáne joıý jumystaryn júrgizedi.

Eske sala keteıik, biz buǵan deıin elordada júrgizýshi kýáligin 80-120 myń teńge aralyǵynda satqandar ustalǵanyn jazǵan bolatynbyz.