Astanada júrgen eńbek mıgranttarynyń 70-80 paıyzy zańsyz jumys isteıdi
ASTANA. QazAqparat - 2015 jyly Astana qalasyna 130 myń mıgrant kelgen. Bulardyń 70-80 paıyzy zańsyz jumys istegen. ıAǵnı, elordamyzǵa qonaq retinde nemese týrıst retinde tirkelip, zańsyz eńbek etken. Bul týraly búgin Astanada eńbek mıgratsııasy jəne adam saýdasyna qarsy memlekettik organdar men halyqaralyq uıymdardyń ózara əreketi taqyrybynda ótip jatqan jıyn barysynda Astana qalasy boıynsha eńbek mıgranttaryn oqytý jəne qoldaý ortalyǵynyń jetekshisi Qanat Myrqaıdarov məlim etti.
"Jyl saıyn Qazaqstanǵa, sonyń ishinde, Astana qalasyna kelip-ketetin mıgranttardyń sany kóbeıip keledi. Al, mıgranttar - adam saýdasyna bastaıtyn eń negizgi faktor. Mıgranttardyń kóbi memleketimizde zańsyz jumys istep júr, ıaǵnı, olardyń qandaı da bir dərejesi joq, jumys berýshi mıgrantpen kelisimshrt jasaspaıdy, tıisinshe, mıgrant eńbek salyǵyn tólemeıdi. Al, búgin eshqandaı qujatsyz jumys istep jatqan mıgrant erteń qulǵa aınalyp ketýi múmkin", - deıdi Q.Myrqaıdarov.
Bul rette Qazaqstannyń Eýrazııalyq ekonomıkalyq odaqqa qosylýy eńbek mıgratsııasynyń shekarasyn keńeıtip jibergeni anyq. Tipti, sarapshylardyń boljamynsha, mıgranttardyń sany eki-úsh esege artady.
"Eýrazııalyq ekonomıkalyq odaq aıasynda jumys kúshiniń erkin aınalymy bastaldy, odaqqa múshe elderdiń azamattary ruqsat qaǵazyna júginbeı-aq, jumysqa ornalasyp júr. Al, jalpy, Qazaqstanǵa keletin mıgranttardyń kóbi Ózbekstan, Qyrǵyzstan, Reseı men Belarýs elderiniń azamattary ekenin bilesizder. Mysaly, byltyr Astananyń ózine 130 myńnan asa mıgrant kelgen. Olardyń 70-80 paıyzy zańsyz jumys istegen. Mıgranttardyń kóbi qonaqqa kelgendeı bolyp nemese týrıst retinde tirkelip, ary qaraı kóleńkeli ekonomıkada zańsyz, eńbek salyǵyn tólemesten jumys istegen",-deıdi Q.Myrqaıdarov.
Onyń aıtýynsha, qarııalardy kútetin, bala baǵatyn, úı tazalap, jekemenshik nysandardy salatyn, sondaı-aq as úıdiń jumysyna tartylatyn mıgranttardy tabý da, jazalaý da qıyn. Sebebi, olar jeke adamnyń úıinde turady jəne eń qaýiptisi - quldyqqa túsý qaýpi de kóp. Mysaly, Astana qalasy boıynsha Ózbekstan men Qyrǵyzstannan kelgen úsh adam quldyqtan qutqarylǵan eken.
